Nga mesnata e sotme lëvizim pa viza, gjithçka duhet të dimë

Një material special, i detajuar që vihet në dispozicion të të gjithë lexuesve të interesuar për të lëvizur në vendet e Bashkimit Evropian dhe të tjera të përfshira në zonën Shengen. Më poshtë gjendet i detajuar, minimumi financiar për qarkullim tremujor në zonën “Shengen”, për shtetet kryesore që ju mund të vizitoni.

Duke nisur nga mesnata e sotme, në hyrje të datës 15 dhjetor 2010, të gjithë shtetasit shqiptarë të cilët posedojnë një pasaportë biometrike, janë të lirë të hyjnë në vendet e Bashkimit Evropian lirisht, për një periudhë tre mujore brenda hapësirës gjashtë mujore.

Ministri i Brendshëm Lulzim Basha konfirmoi se “duke nisur nga sekondat e para të datës 15 Dhjetor në mbrëmjen kur kalon e marta dhe hyn e mërkura, hyn në fuqi vendimi i marrë nga Bashkimi Evropian për të hequr barrierën e vizave afatshkurtra për të gjithë shtetasit e Republikës së Shqipërisë të cilët disponojnë një pasaportë biometrike.

Ndërkohë, Michele Cercone, zëdhënës i Komisionit Evropian, duke folur për mediat lidhur me heqjen e vizave, konfirmoi edhe ai, se “lëvizja e lirë e qytetarëve shqiptarë në zonën “Shengen”, fillon nga minuta e parë pas mesnatës së datës 14 dhjetor 2010”.

Z. Cercone deklaroi se “sigurisht, duke filluar nga ai moment, qytetarët e Shqipërisë mund të udhëtojnë lirisht në zonën “Shengen” pa viza”.

Zëdhënësi i Komisionit Evropian, pohoi se heqja e vizave, “është një mundësi e shkëlqyer për shkëmbime tregtare, turizëm, apo vizita familjare, por nuk të jep të drejtën për t’u transferuar dhe për të jetuar në një shtet të zonës “Shengen”.

Kurse ka bërë edhe një kujtesë me këtë rast: “Rikujtoj se bëhet fjalë për lirinë e lëvizjes për motive turizmi, apo tregtie, por ky qëndrim nuk mund të jetë më shumë se tre muaj për një periudhe gjashtë mujore. Pra, kjo përjashton qëndrimin e gjatë në vendet e zonës “Shengen” dhe njëkohësisht qëndrimin për motive pune apo azil politik”.

Ndërkohë, kontrollet në vendkalimet kufitare, do të vazhdojnë sikundër edhe më parë.

Por çfarë ndryshon: Tashmë, doganierët dhe kontrollorët në palën shqiptare dhe atë të vendeve të BE apo zonës “Shengen” në tërësi, do t’ju bëjnë si kërkesë themelore jo vizën brenda pasaportës ndërkombëtare, por pasaportën ndërkombëtare biometrike.

Duke qenë se për qytetarët shqiptarë bëhet fjalë për një qëndrim deri tremujor për çdo gjashtë muaj, mund të bëhen kërkesa opsionale, në mënyrë të personalizuar për udhëtarë të ndryshëm, konform udhëzimeve të shpërndara nga secili shtet për pikat e tyre kufitare.

Kështu në kontrollin kufitar ju mund t’ju kërkohet një kartë krediti e cila për hir të së vërtetës u mbyll gojën shpejt dhe pa fjalë të shumta kufitarëve të huaj.

Kurse opsionale janë kërkesat e tyre ndaj shtetasve shqiptarë, për shkresurina të tilla burokratike, si bileta e kthimit, adresa e vendbanimit të personit që vizitohet nga udhëtarët, apo destinacioni i përafërt në vendet e “Shengen”-it që do të vizitojnë udhëtarët shqiptarë.

Po ashtu një kërkesë thuajse e përhershme rutinë e kufitarëve të huaj do të jetë se sa ditë do të jetë qëndrimi i juaj në vendet e zonës Shengen. Përgjigjja juaj ndonëse mund të jetë apriori, konsiderohet e mirëqenë nga kontrollori kufitar por e rëndësishme është që të mos shkelen afatet 3 mujore të qëndrimit në harkun kohor prej gjashtë muajsh, pasi rrezikohen penalitete individuale.

Këshillë vlefshme në këto raste është që qytetarët shqiptarë, të mbajnë me vete të gjitha elementet që mund të provojnë, që qëllimi është për të qëndruar për një periudhë afatshkurtër pra brenda limiteve kohore të sipërpërmendura.
Nga ana tjetër ka qytetarë që duan të mësojnë, nëse duhet të kenë lekë (euro) me vete, apo do të mjaftonte një kartë krediti?

Michele Cercone, zëdhënës i Komisionit Evropian pohon se edhe kjo varet nga kontrolli i personalizuar për çdo individ pasi kontrollori kufitar ka hapësirë relative për të krijuar dyshime të besueshme që mund ta lejojnë atë që të mos pranojë hyrjen në vendin ku është kërkuar të kalohet.

“Më mirë, të kesh gjithnjë me vete shumicën e dokumenteve, provave, rezervimeve të hotelit, në rastin e atyre që kanë rezervuar, si dhe biletën e kthimit, në mënyrë që nëse ka kontrolle të tilla, atëherë të mos ketë probleme”, – thotë z.Cercone.

Kujtojmë këtu faktin se të gjitha vizat që jepen nga vendet e BE apo dhe SHBA, gjithmonë qartësojnë se “viza nuk presupozon domosdoshmërisht se është i arritur kalimi i kufirit”, por asnjëherë nuk janë raportuar raste të pengimit të personave në kufi me viza të rregullta, ndaj gjasat janë që kështu të ndodhë edhe tani që u hoqën vizat.

Duke q enë se nuk ka rregulla precize, kontrollet mund të bëhen rast për rast dhe të lidhen me situatën personale të çdo shtetasi.

Më poshtë gjendet i detajuar, minimumi financiar për qarkullim tremujor në zonën “Shengen”, për shtetet kryesore që ju mund të vizitoni

Itali

Nga 1 në 5 ditë:
Një person: 269 euro
Dy ose më shumë persona: 212,81 euro
Nga 6 deri në 10 ditë
Një person: 44, 93 euro
Dy ose më shumë persona: 26,33 euro
Për 11 deri në 20 ditë:
Një person:
Shuma fikse: 51,64 euro + 36,67 në ditë
Dy ose më shumë persona:
Shuma fikse: 25,82 euro + 22,21 në ditë
Më shumë se 20 ditë:
Një person:
Shuma fikse: 206,58 euro + 27,89 në ditë
Dy ose më shumë persona:
Shuma fikse: 118,79 euro + 17,04 në ditë

Greqi
20 euro në ditë

Gjermani
45 euro në ditë

Belgjikë
38 euro në ditë për ata që s’kanë kartë krediti

Francë
52,60 euro në ditë

Holandë
34 euro në ditë

Zvicër
100 CHF në ditë
studentët (30 CHF) në ditë

Austri
E papërcaktuar

Qipro
E papërcaktuar

Danimarkë
60 euro në ditë

Spanjë
63, 20 euro në ditë

Finlandë
30 euro në ditë

Hungari
1000 HUF

Islandë
4000 ISK

Letoni
60 LVL në ditë

Lituani
15LVL në ditë

Luksemburg
( e papërcaktuar)

Maltë
20MTL (48 euro në ditë)

Norvegji
500 NOK/ditë për ata që s’shkojnë te familjarë)

Poloni
500 PLN

Portugali
75 euro për hyrje
40 euro në ditë

Sllovaki
E papërcaktuar

Slloveni
70 euro në ditë (për ata që s’shkojnë te familjarët)

Suedi
E papërcaktuar

Republika Çeke
0,5 herë minimumin e nevojave personale në ditë (sipas legjislacionit) për më pak se 30 ditë

loading...

Leave a Reply

Your email address will not be published. Required fields are marked *

Back to top button