I shkaktuan shtetit shqiptar miliona euro dëm, “kinezi” i Bankers “ia hedh paq”, lirohet nga qelia edhe CEO i kompanisë
Gjykata e Posaçme kundër Korrupsionit dhe Krimit të Organizuar, ka nxjerrë nga qelia CEO-n kinez të kompanisë “Bankers Petroleum”, Hongping Xiao. Këtë të mërkurë togat e zeza kanë vendosur masën “arrest shtëpie” për Xiaon, masë kjo e konfirmuar së fundmi edhe nga vetë kompania.
Vendimi vjen vetëm pak ditë pasi GJKKO, me kërkesë të SPAK, zgjati fatet hetimore me tre muaj për dosjen “Bankers”.
Në nëntor të vitit të kaluar, gjyqtari Erjon Çela vendosi që të nxjerrë nga qelia edhe ish-drejtuesin e kompanisë “Bankers Petroleum”, Leonidha Çobo. Ashtu sikurse dhe për CEO-n kinez, edhe Çobo u la në masën e sigurisë “arrest shtëpie”.
Kujtojmë se Çobo së bashku me Hongping Xiano, u arrestuan në datën 2 korrik të këtij viti pas një operacioni të ndërmarrë nga Prokuroria e Fierit e cila lëshoi 14 masa sigurie për drejtues, ish-drejtues dhe punonjës të “Bankers Petroleum”.
Hetimet për Bankers:
Në ditët e para të Korrikut 2025, Prokuroria e Fierit urdhëroi një operacion të befasishëm në zyrat qendrore të kompanisë “Bankers Petroleum Albania”, duke lëshuar 14 masa sigurie për punonjësit.
Procedimi penal ishte regjistruar më datë 30.12.2024 dhe hetimet nisën pas referimit nga Drejtoria e Hetimit Tatimor pranë Drejtorisë së Përgjithshme të Tatimeve dhe pas një hetimi 6-mujor edhe me metoda të hetimit proaktiv, në bashkëpunim të ngushtë me Drejtorinë e Hetimit Tatimor, u grumbulluan prova të mjaftueshme të cilat krijojnë dyshimin e arsyeshëm se janë konsumuar elementet e figurave të veprave penale për të cilat është regjistruar ky procedim penal.
Ka rezultuar se, shoqëria “Bankers Petroleum Albania Ltd”, nga viti 2004 e deri në fund të vitit 2024 ka dalë me humbje, çka ka bërë që shteti shqiptar të mos përfitojë asnjë të ardhur prej 20 vitesh nga ky aktivitet, pavarësisht se janë nxjerrë e tregtuar sasi të konsiderueshme karburanti në zonat e njohura me rezerva nafte, Patos-Marinëz-Fier.
Është vërejtur se, shoqëria ka kryer eksporte dhe shitje brenda vendit nga viti 2004 deri në vitin 2024 në vlerën prej 532,433,614,112 lekë. Po ashtu, rezulton se shoqëria ka deklaruar shpenzime tatimore në vlera që tejkalojnë të ardhurat nga eksportet dhe shitjet, duke dalë në çdo vit ushtrimor me humbje, ku vlera totale për të gjitha periudhat është në shumën 11,691,799,688 lekë.
Nga hetimi, dyshohet se dëmi i shkaktuar në buxhetin e shtetit, përmes përfitimit të TVSH-së, është në miliona euro.
Dyshohet se, gjatë gjithë periudhës që ka ushtruar aktivitetin e saj, shoqëria “Bankers Petroleum Albania Ltd” ka rritur në mënyrë fiktive shpenzimet e saj, me qëllim që në bilancin vjetor të rezultojë me humbje, e më pas nuk ka paguar asnjë tatim mbi fitimin, por ka përfituar nga rimbursimi i TVSH-së nëpërmejt skemave mashtruese, e ndihmuar dhe nga individë e shoqëri të tjera kontraktuese të saj, me objekte dhe veprimtari të ndryshme.
Për arritjen e këtij qëllimi, nga shoqëria e punonjësit e saj dyshohet se janë falsifikuar dokumente të ndryshme dhe kryhen operacione financiare të natyrave të ndryshme me operatorë dhe individë të ndryshëm si brenda dhe jashtë Shqipërisë.
Në pranga ra numri 1 i kompanisë Hongping Xiao, i cili prej vitesh drejtonte aktivitetin e Bankers Petroleum si dhe ish-drejtuesi i saj, Leonidha Çobo, ku ndaj këtij të fundit në 4 nëntor u ndryshua masa e sigurisë.
Por, pas Çobos, së fundmi GJKKO vendosi që të nxjerrë nga qelia edhe numrin 1 të kompanisë, ndërkohë hetimet lidhur me këtë aferë e cila i shkaktoi shtetit shqiptar miliona euro.