Qeveria gati draftin e amnistisë penale: Lirim i menjëhershëm për 380 persona, kush përfiton ulje të dënimit dhe kush përjashtohet (E PLOTË)

Qeveria ka përgatitur një draft për amnisti penale, i cili pritet të kalojë fillimisht në Këshillin e Ministrave dhe më pas në Kuvend. Dokumenti, i siguruar nga Report Tv, parashikon përfitime për mbi 10 mijë persona, mes tyre rreth 380 të burgosur që do të lirohen menjëherë dhe afro 1 mijë të tjerë që do të përfitojnë ulje dënimi.

Sipas draftit, lirim të menjëhershëm do të përfitojnë burrat që janë dënuar deri në 3 vite burg ose u ka mbetur për të vuajtur deri në 3 vite, si dhe gratë e dënuara deri në 4 vite ose me 4 vite të mbetura burg. Po ashtu, amnistia përfshin gratë mbi 50 vjeç, burrat mbi 60 vjeç dhe personat që në momentin e kryerjes së veprës penale kanë qenë 18 vjeç ose më të vegjël, me përjashtim të veprave të rënda penale.

Drafti parashikon gjithashtu ulje dënimi me 1 vit për burrat dhe 1 vit e gjysmë për gratë dhe të miturit, ndërsa rreth 9 mijë persona të tjerë përfitojnë pushim të ndjekjes penale për vepra të kryera deri më 31 dhjetor 2025, të dënueshme deri në 3 vite burg.

Nga amnistia përjashtohen 19 kategori veprash të rënda penale, përfshirë krimet kundër jetës, krimet seksuale, korrupsionin, terrorizmin, bandat e armatosura, si dhe të gjitha veprat që gjykohen nga GJKKO.

LIROHEN MENJËHERË NGA BURGU (me përjashtimet e ligjit)

Burrat e dënuar deri në 3 vite ose më pak

Gratë e dënuara deri në 4 vite ose më pak

Burrat që u ka mbetur deri në 3 vite burg

Gratë që u ka mbetur deri në 4 vite burg

Burrat që janë 60-vjeç ose më shumë

Gratë që janë 50-vjeç ose më shumë

Të gjithë ata që ishin 18-vjeç kur kryen krimin

VEPRA PENALE QË PËRJASHTOHEN NGA AMNISTIA

Krime kundër njerëzimit

Krime kundër jetës

Krime kundër shëndetit

Krime seksuale

Krime kundër lirisë së personit

Krime kundër moralit dhe dinjitetit

Krime kundër fëmijëve, martesës e familjes

Krime kundër pasurisë dhe në sferën ekonomike

Krime të falsifikimit të dokumenteve

Krime kundër të tokës e të ndërtimeve

Krime kundër mjedisit

Krime kundër pavarësisë e rendit kushtetues

Krime që cenojnë marrëdhëniet me shtetet e tjera

Krime me qëllime terroriste

Krime kundër autoritetit të shtetit

Krime kundër drejtësisë

Krime kundër zgjedhjeve

Krimet nga banda të armatosura dhe organizata kriminale

Krime që gjykohen nga GJKKO