“Shqyrtimi zgjati vetëm 1 orë”, Bardhi në ‘Kushtetuese’: Të shfuqizohen ndryshimet në Rregulloren e Kuvendit

Në Gjykatën Kushtetuese po mbahet sot, 10 shkurt, një seancë publike për ndryshimet në Rregulloren e Kuvendit.

Aktualisht po flet kreu i grupit parlamentar të Partisë Demokratike, Gazment Bardhi, duke parashtruar argumentet se pse PD ka kundërshtuar ndryshimet që sipas kësaj force politike janë “të njëanshme”, referuar Partisë Socialiste.

Më tej, demokrati tha se nuk pengohet funksionimi demokratik i Kuvendit, në rast se këto ndryshime shfuqizohen.

“Kuvendi nuk humb asgjë nëse funksionon me 8 komisione, nuk sjell asnjë pasojë”, deklaroi ai.

Pjesë nga diskutimi në GJK:

Gjykatësi: Siç shihet ka një ndërhyrje gati të plotë mbi përbërjen dhe strukturën e komisioneve, fushën që mbulojnë, duke u shtuar nga tre komisione nga ato që kanë qenë më përpara. A keni pasur ndonjëherë diskutime, projekte për të riformatuar fushën e mbulimit të komisioneve, për të ndryshuar numrin e tyre? Në rast se ky vendim shfuqizohet si antikushtetues, çfarë pasojash sjell në funksionimin normal të komisioneve dhe cila sipas jush mund të ishte pika që mund të gjejë dakordësi duke u nisur nga eksperienca 7-mujore?

Bardhi: Besoj në 1 orë nuk ke kohë të hapësh letrat, jo më të diskutosh. Është rasti i dytë në historinë parlamentare, ndryshimet për shkak se përcaktojnë bashkëjetesën demokratike mes palëve, ka pasur gjithmonë diskutime me rregulla me konsensus. Ky është rasti i parë në histori në fakt që shqyrtohet për 1 orë. Unë kam ngritur shqetësime sepse ka mospërputhje mes dispozitave ligjore.