Google: Hakerët e sponsorizuar nga shteti synojnë punonjësit e sektorit të mbrojtjes

Google raporton se kompanitë e mbrojtjes dhe punonjësit e tyre janë bërë objektiv i fushatave të spiunazhit kibernetik të sponsorizuara nga shtetet. Sipas raportit, hakerët përdorin metoda të personalizuara dhe drejtpërdrejt për të sulmuar punonjësit, përfshirë shfrytëzimin e proceseve të rekrutimit dhe sistemet personale jashtë rrjetit të kompanive, shkruan The Guardian.

Sulmet përfshijnë falsifikime të faqeve të internetit të qindra kontraktorëve kryesorë në SHBA, BE, Ukrainë, Turqi dhe Kore të Jugut. Grupi APT5 i lidhur me Kinën, si dhe hakerë nga Koreja e Veriut dhe Irani, kanë përdorur email-e dhe mesazhe të personalizuara për të marrë informacion ose për të vjedhur të dhëna financiare dhe kredenciale.

Autoritetet ukrainase raportojnë një rritje prej 37% të incidenteve kibernetike nga 2024 në 2025. Ekspertët paralajmërojnë se objektivat përfshijnë jo vetëm qytetarë ukrainas, por edhe punonjës të huaj, kontraktorë dhe konsulentë të përfshirë në projekte të lidhura me Ukrainën, duke e bërë kërcënimin një çështje të sigurisë transnacionale.