Athina reagon për çertifikatat

Zëdhënësi i Ministrisë së Jashtme greke tha se Athina do të informojë Bashkimin Europian për këtë dhe se ka dyshime se qarqe të caktuara ekstremiste, po i imponojnë qeverisë shqiptare vendime të tilla që cënojnë të drejtat e minoriteteve.

Zëdhënësi Delavekuras, kërkoi nisjen e dialogut me përfaqësuesit e minorietetit grek në lidhje me këtë cështje.

Grigoris Delavekuras paralajmëroi gjithashtu se për këtë do të njoftojë të gjitha organet kompetente të Bashkimit Europian.

Me ton të lartë dhe kërcënues, zëdhënësi përmendi ndihmëm, që sipas tij, Greqia ka mbështetur rrugën europiane të Ballkanit Perëndimor në kuadër të axhendës së Samitit të Selanikut që në vitin 2003 si dhe përpjekjet për implementimin e axhendës për vitin 2014.

“Cështja e cërtifikatave me ndryshimin e kombësisë, e përdorur ndër vite në vendin fqinj, në kombinim me shtyrjen e regjistrimit të popullsisë, na bën të dyshojmë se qarqe të caktuara ekstremiste po i imponojnë qeverisë politika aspak largpamëse. Ne besojmë që këto qarqe nuk duan të ketë një regjistrim të saktë të minoriteteve në Shqipëri”, thotë zëdhënësi i Ministrisë së Jashtme greke duke i bërë thirrje qeverisë shqiptare të fillojë dialogun serioz dhe të sinqertë me përfaqësuesit e minoriteteve.