160 mln euro në 6 muaj / Ç’do bënim po të mos ishte puna jashtë vendit?

Të ardhurat nga puna jashtë vendit janë një burim gjithnjë e më i rëndësishëm të ardhurash për ekonominë shqiptare.

Sipas Bankës së Shqipërisë për 6-mujorin e parë të këtij këto të ardhura kishin vlerën e 160 milionë eurove, një rritje me 5.2% krahasuar me të njëjtën periudhë të vitit të kaluar.

Kjo shumë përfshin të ardhurat nga punësimi sezonal i shqiptarëve jashtë vendit ose nga puna në distancë që shqiptarët kryejnë për subjekte që ndodhen jashtë Shqipërisë.

Puna në distancë lidhet me të ashtuquajturat shërbime outsourcing, që shumë kompani i kontraktojnë në vendet ku kosto e punës është më e lirë.

Për të gjithë vitin 2018, të ardhurat nga puna kishin vlerën e 285 milionë eurove, ndërsa duke parë tendencën e 6-mujorit gjasat janë që kjo shifër të jetë më e lartë për këtë vit.

Shifrat dëshmojnë se të ardhurat nga jashtë tashmë nuk lidhen vetëm me remitancat dhe emigracionin e përhershëm, që gjithsesi kënë përmasa domethënëse dhe madje kanë nisur një cikël të ri rritjeve gjatë viteve të fundit.

Për gjysmën e parë të vitit 2019, vlera e remitancave të dërguara në Shqipëri ishte 336 milionë euro, pesë milionë euro më shumë se në gjashtëmujorin e parë 2018.

Por shqiptarët po kërkojnë mundësi punësimi jashtë edhe në mënyrë të përkohshme apo duke punuar nga Shqipëria.

Për një ekonomi si ajo shqiptare, me një deficit të thellë tregtar, gjetja e mënyrave për të ngushtuar këtë deficit ngelet e rëndësishme, – shkruan portali Scan, i fokusuar në temat ekonomike.