Eurodeputetja: Ankaraja mund të hyjë në BE nga dritarja, përmes Shqipërisë

Pak orë pasi deputetët e Parlamentit Europian miratuan rezolutën e cila konsideroi një gabim vendimin e Komisionit Europian për mos hapjen e negociatave me Shqipërinë e Maqedoninë e Veriut, europarlamentarja e Partisë Lidhja, Cinzia Bonfrisco, në një intervistë për mediat italiane kërkon që të tregohet shumë kujdes në procesin e hapjes së negociatave për pranimin e Shqipërisë në BE.

Influenca e madhe që Turqia ka sot në Shqipëri, numri i madh i shtetasve shqiptarë me shtetësi turke, kriminaliteti me vizion oligarkik në Ballkan e boshllëqet në shtetin e së drejtës përbëjnë për eudeputeten italiane Cinzia Bonfrisco, elementë preokupues për Bashkimin Europian e sinjale rreziku mbi ndryshimet gjeopolitike në këtë territor.

“Procesi i zgjerimit të BE, që zgjat disa vite, nuk mund të aktualizohet në konsideratë me zhvillimin e Shqipërisë dhe Maqedonisë së Veriut sot. Siç kam thënë dhe më parë, Shqipëria sot nuk është ajo e 30 viteve më parë e duhet vëzhguar me vëmendje për ndryshimet gjeopolitike që kanë ndodhur. Shqipëria ka mbi 50% të popullsisë të besimit mysliman e shumica e tyre kanë dy nënshtetësi shqiptare e turke. E Turqia është një vend me një influencë të madhe në vendin e shqiponjave. Prandaj, ne që sot stigmatizojmë Turqinë duke i mbyllur portën e BE, nga ana tjetër nuk duhet të fshehim faktin se Ankaraja mund të hyjë në BE nga dritarja , përmes Shqipërisë”, thotë ajo.

Për eurodeputeten italiane të Lidhjes, disa vende të Ballkanit përbëjnë një rrezik të fortë për kohezionin europian, për stilin e një jetë europiane e që sot synohet të jetë një status kulture për qytetarët europianë.

“Në Kosovë, thotë Cinzia Bonfrisco, 95% e popullsisë janë myslimanë, në Maqedoninë e Veriut 28%. Këtij fakti i duhet shtuar preokupimi i madh ndaj dy elementeve; statusi aktual i shtetit të së drejtës, i cili është mjaft prapa, e depërtimi i kriminalitetit, trafiku i drogës, i armëve, i qenieve njerëzore me një prirje drejt një vizioni oligarkik. E nuk duhet harruar, shton ajo as influenca kineze në kreshtën ballkanike.”

“Procesin e zgjerimin e kemi konsideruar një element pasurimi për BE e nuk mund të flasim për anëtarësime të këtyre vendeve, derisa nuk kemi garancitë e nevojshme për të mos i konsideruar këto vende një rrezik për ekuilibrin e BE”, shton ajo.

Për Cinzia Bonfrisco, zgjerimi i BE merr kuptim kur ai forcon statusin dhe ekonominë e qytetarëve europianë. E zgjerimi në parim duhet të matet me realitetin.