Ilir Meta kërcënon me shpërndarje Parlamenti: Do i drejtohem popullit, kujtuan se më hoqën qafe duke më vënë president

Ilir Meta ka folur për gazetarët, ndërsa Kuvendi u mblodh për një seancë të jashtëzakonshme, lidhur me emërimin e paligjshëm të Marsida Xhaferllarit si anëtare e Gjykatës Kushtetuese.

Meta kërcënoi me shpërndarje Parlamenti dhe tha se do t’i drejtohet popullit e botë, për të mbrojtur demokracinë në vend.

“Kam një paralajmërim të fundit për ata që mendojnë se betimi i Metës me dorën mbi kushtetutë si president ka qenë një proces formal apo ceremonial.

Nuk ka institucion më të rëndësishëm në Shqipëri se Kushtetuta, e cila ka vetëm një garant të pacenueshëm, që është Gjykata Kushtetuese.

Përpjekjet për të dhunuar Kushtetutën, në përpjekje për të kapur përfundimisht gjithë sistemin e drejtësisë në Shqipëri, me kapjen e Gjykatës Kushtetuese, janë të dështuara, janë të vdekura.

Askush të mos guxojë të përdhosë Gjykatën Kushtetuese.

Parlamenti, me një dekret shpërndahet, qeveria me mocion mosbesimi rrëzohet, presidenti me një impeachment nga një parlament legjitim, jo nga ky…përsëri shkarkohet nga Gjykata Kushtetuese.

Nëse dikush mendon se angazhimet e mia kanë qenë ceremoniale do t’i bëj të qartë se kjo është Kushtetutë që mbron popullin dhe do të jetë detyrë e popullit dhe e presidentit t’i tregojnë vendin kësaj bande uzurpatore”, tha Meta.

I pyetur nëse po kërcënon me shpërndarjen e Parlamentit, Meta tha:

“Besoj se jam shumë i qartë, secili të zbatojë kompetencat e veta, veprimet do të vazhdojnë të jenë nga presidenti institucionale.

Dhe në momentin e duhur presidenti do t’i drejtohet popullit dhe gjithë botës për të mbrojtur demokracinë që është dhunuar në mënyrën më barbare sidomos këto 2 vite kur është lënë qëllimisht pa Gjykatë Kushtetuese. I uroj suksese anëtarëve të rinj të Gjykatës Kushtetuese”.(TemA)