Negociatat, Shqipëria në filtrin e Komitetit të Jashtëm të PE-së

Komiteti për Politikën e Jashtme në Parlamentin Europian u mblodh këtë të hënë në një takim të posaçëm për shkëmbimin e pikëpamjeve mes eurodeputetëve për progresin e Shqipërisë, kushtet e vendosura nga BE dhe problematika të tjera që shqetësojnë Brukselin.

Diskutimi nisi nga kryetari i Komitetit me aktin e shembjes së godinës së Teatrit Kombëtar, por nuk u ndal vetëm tek kjo. “E kuptoj që shumë prej nesh këtu në Komitetin e Jashtëm jemi të shqetësuar nga fakti dhe metoda e përdorur për të shembur Teatrin Kombëtar më 17 maj. Kjo u përshkrua gjerësisht si një sulm ndaj trashëgimisë kulturore europiane”, deklaroi në hyrje të seancës, kreu i Komitetit të Punëve të Jashtme, David Mcallister.

Mcallister dhe eurodeputetët e tjerë përshëndetën që të gjithë marrëveshjen e 5 qershorit për ndryshimet në Kodin Zgjedhore, megjithëse kjo marrëveshje mbetet ende në pikëpyetje dhe e pambyllur mes palëve.

Ndërkohë, eurodeputetit i djathtë, David Lega qortoi ashpër paketën antishpifje dhe duke cituar një raport të Europol thotë se pandemia e koronavirusit ka shtuar prodhimin e hashashit në vend. “Paketa antishpifje është një turp! Ajo shkel Kushtetutën, shkel të drejtat e njeriut dhe minon aspiratat e Shqipërisë për në BE. Kanabisi vazhdon të ketë rritje sipas Europol dhe në Shqipëri kemi një ekzekutiv që është i ashpër me gazetarët dhe i butë me krimin”, deklaroi ai.

Ndërkohë të majtët Tonino Pecula dhe Genoveva Ruiz Calavera thanë se vendi ka shënuar progres në rrugën e reformave, sa i takon sundimit të ligjit, luftës ndaj krimit të organizuar dhe korrupsionit dhe në reformën në drejtësi. Calavera theksoi se pavarësisht krizës së pandemisë, procesi i reformës në drejtësi vazhdoi. Ajo kujtoi emërimet në Gjykatën Kushtetuese dhe në Gjykatën e Lartë si tregues të këtij progresi.

Kroati Tonino Pecula vuri në dukje “absurditetin” e 15 kushteve të vendosura nga Parlamenti Europian. Ai thotë se ka patur një keqinterpretim të vendimit të Këshillit Europian nga ana e PE-së dhe ngre pyetjen se si do të vlerësohet progresi i këtyre 15 kushteve?

Euroskeptikët dhe përfaqësuesit e ekstremit të djathtë u treguan të ashpër. Shqipërinë ata e marrin si shembull për të kundërshtuar procesin e zgjerimit. Njëri prej eurodeputetëve të këtij grupi ngriti shqetësimin se Shqipëria është aleate e ngushtë e Turqisë dhe se “ka lidhje të forta me ekstremistët në Kosovë”.

Përgjigjen ndaj këtyre “shqetësimeve” e morën nga eurodeputeti Thomas Waltz.

“Ka gjithmonë një anë për të qeshur kur vjen puna tek euroskeptikët. Gjithmonë e shohin rrezikun e lidhjes së Shqipërisë me Erdogan, por nuk i shohin lidhjet serbe me Rusinë”, tha ai, duke shtuar se Shqipëria ka bërë progres në sundimin e ligjit, por kërkoi më shumë përparim sa i takon respektimit të të drejtave të pakicave dhe minoriteteve.

Eurodeputeti gjerman i së djathtës, Michael Gahler u ndal tek dosjet 184 dhe 339 për shit-blerjen e votës në Dibër dhe në Durrës. Ai tha se për këto dosje ende nuk kishte asnjë të hetuar dhe ndëshkuar.

Gjatë diskutimeve eurodeputetët propozuan gjithashtu që të hetohen procedurat e shembjes së godinës së Teatrit Kombëtar, si dhe të mbikëqyret tenderi për ndërtimin e godinës së re, duke qenë se Shqipëria është një prej vendeve që për shkak të tërmetit dhe Covid19 do të përthith më shumë fonde nga BE.