“Çudi e madhe”, Rama u përgjigjet kritikëve të Rindërtimit: Si ka mundësi që fjala e keqe, u vjen si kryefjalë edhe kur shohin punë të mirë

Kryeministri Edi Rama ka shpërthyer ndaj kritikëve të procesit të Rindërtimit dhe shkas janë bërë komentet në FB në adresë të tij për një fragment video-je ku tregohej një kolonë me 4 hekura.
Rama ka sqaruar se kolona është me 4 hekura sepse pjesa brenda mbushte me beton por ai thotë se disa njerëz fjala e keqe u vjen si kryefjala e mendimit të tyre edhe kor shohin një punë të mirë.
Më tej kryeministri ka thënë se këta njerëz nuk mund t’i justifikojë kur shpifjet dhe sajesat e sharjet janë bërë normë komunikimi në debatet publike, mediatike dhe politike.
Por ai premton se Rindërtimi do të jetë një faqe e bukur për të trashëguar një Shqipëri edhe më të bukur se ajo 7 vite më parë.
STATUSI NGA EDI RAMA
ÇUDI E MADHE?
Duke ndjekur komentet tuaja në makinë gjatë kthimit në zyrë pasi vumë tullën e parë të Rindërtimit sot, më ra në sy që disa nga ju kapeshin tek “4 fijet e hekurit” të kolonës mbajtëse të shtëpisë, duke përqeshur, sharë e deri edhe mallkuar, sepse sipas tyre, shtëpia do binte nga era, paratë ishin vjedhur, njerëzit ishin mashtruar, etj.
Po si ka mundësi si(!), si ka mundësi që mllefi, verbëria, padurimi a ku di unë se çfarë, t’i shtyjnë disa deri në këtë pikë dhe të mos e kuptojnë as vetë se sa qesharakë bëhen, kur fjala e keqe u vjen si kryefjala e mendimit të tyre edhe kur, dreqi e mori, shohin një punë të mirë!
Po si ka mundësi që edhe njerëz që punojnë, djersijnë, jetojnë me mundin e tyre, kur vjen puna për të parë punën e të tjetrit a tonën në këtë rast, verbohen dhe prishin gojën pa asnjë gajle pavarësisht se sa e gabuar është ajo që thonë!
Po si ka mundësi që dikujt të mund t’i shkojë mendja se kjo “kolonë me 4 fije hekur” na qenka prova e të gjitha të këqijave, kur në fakt është thjesht skeleti i kolonës, që mbushet me hekur! Por nuk kam se si të mos i justifikoj në fund njerëzisht e zakonshëm që flasin kësisoj, kur shpifjet, sajesat e sharjet, janë kthyer prej kohësh në normë komunikimi në hapësirën e debatit publik, politik e mediatik!
E që ta mbyll, Rindërtimi do të jetë një faqe e bukur e punës sonë të stërmundimshme (e jo pa të meta) për të ndërtuar një Shqipëri më të mirë, më të drejtë, më të bukur se ajo që trashëguam 7 vjet më parë dhe një shembull që të kujtohet gjatë, për transformimin e jashtëzakonshëm social e urban që do të sjellë, aty ku në 26 nëntor fatkeqësia e madhe goditi fort duke sjellë vdekje, plagë e ankth për të nesërmen, e cila do të jetë shumë më e ndritur se e djeshmja për mijëra familjet e prekura nga ajo fatkeqësi❤️?