Situatë e rëndë në spitalet COVID, 20 pacientë në terapi intensive e 4 të intubuar

Teksa njoftoi për bilancin e 24 orëve të fundit me 4 të vdekur e 119 raste të reja me Covid-19, Ministria e Shëndetësisë njoftoi sa ka rritje të të shtruarve në spitalet COVID.

“Megjithë 45 të shëruarit, vijon të ketë rritje të të shtruarve në spitalet COVID. Aktualisht në dy spitalet COVID, në spitalin Infektiv dhe spitalin “Shefqet Ndroqi” po trajtohen 125 pacientë, 20 në terapi intensive dhe 4 pacientë janë të intubuar.

Gjatë 24 orëve të fundit janë kryer 482 testime për të dyshuar të prekur me COVID19, nga të cilat janë konfirmuar 119 raste pozitive,” u tha në deklaratën për shtyp.

Ministria e Shëndetësisë ju drejtohet të gjithë qytetarëve të zbatojnë vendimin e qeverisë për mbajtjen e detyrueshme të maskës në ambientet e mbyllura dhe kudo nuk është e mundur të ruhet distanca fizike.

U bëjmë thirrje të gjithë qytetarëve të shmangin grumbullimet masive, ceremonitë e çdo lloji, pasi janë burim të përhapjes së infeksionit.