Shehu: Shqipërisë i duhen 150 shtretër të terapisë intensive, pse spitali Covid 3 nuk është zgjidhje

Për ish-ministrin e Shëndetësisë, Tritan Shehu, strategjia e qeverisë për menaxhimin e pandemisë ndaj virusit Covid-19 ka dështuar.

“Në vendin tonë ekzistojnë vetëm 7 shtretër të terapisë intensive sipas standardeve evropiane. Të tjerët janë shtretër të improvizuar si reanimacion në një kohë kur nevojat aktuale janë për 150 shtretër. Po të vëreni se si u menaxhua pandemia në vende të zhvilluara si Italia, brenda 10 ditësh ata krijuan struktura të posacme të terapisë intensive, me infrastrukturë moderne, me aparatura moderne për ofrimin e shërbimit cilësor për pacientët në gjendje të rëndë shëndetësore. Po tek ne? Nuk kemi më shumë se 7 shtretër në dispozicion!”, deklaron Shehu.

Doktor Shehu, si e vlerësoni situatën e krijuar në vend nga pandemia, a po menaxhohet siç duhet?

Kemi një dështim total për arsye që lidhen me mënyrën si u impostua, që u përdor vetëm për kapital politik, për numrin shumë të vogël të testimeve, duke përjashtuar të gjitha laboratorëve për t’i bërë analizat dhe për t’i përmbledhur në një të vetme, për mos mbrojtjen e institucioneve shëndetësore, për mos krijimin e strukturave bashëkohore në terapinë intensive pasi ato ekzistueset lënë shumë për të dëshiruar dhe bëhen shkak për humbje jete.

A do të ishte zgjidhje hapja e spitalit Covid 3?

Ambientet e ish-kirurgjive në QSUT, një strukturë e amortizuar totalisht nuk është zgjidhje. Nuk është terapi intensive vetëm duke zgjeruar disa metra kub apo kate. Duhen urgjentisht importuar struktura të gatshme të terapisë intensive, duhen urgjentisht ekspertë për të montuar shtretërit e duhur të terapisë intensive. Sot ka spitale të gatshme që montohen kudo nga ekspertë. Që nga muaji shkurt e deri tani duhet të ishin marrë masa për ambientet e terapisë intensive për të pritur fluksin e pacientëve të infektuar.

A kemi ne shërbim të terapisë intensive në Shqipëri, sipas standardeve bashkëkohore?

Ne sot disponojmë në spitalin infektiv vetëm 7 shtretër të terapisë intensive, ndërkohë që nevojat janë shumë herë më të mëdha. Ne duhet të kërkojmë specialistë që dinë të montojnë shtretërit e terapisë intensive.

Italia krijoi 4 mijë poste të reja të terapisë intensive për 3 javë dhe Gjermania edhe më shumë. Ne kemi nevojë për 150 poste të reja të terapisë intensive të standardeve evropiane. Ne s’mund të vazhdojmë me shërbim të improvizuar të terapisë intensive.

Brenda qendrës spitalore ka dhe shërbime të tjera spitalore që disponojnë shërbimin e terapisë intensive, të cilat mund t’i vënë në dispozicion të pacientëve me koronavirus.