Si ua hoqi Gjukanoviç shqiptarëve 5 deputetët nga zona zgjedhore

Në prag të zgjedhjeve të 30 gushtit në Mal të Zi, shqiptarët janë të ndarë në dy lista zgjedhore dhe po bëhet një luftë e madhe, që këto lista, të cilat kanë brenda kanë një numër të madh partish të marrin 2 deputetë në Parlamentin e vendit, maksimumi 3.

Por, vetëm disa vjet më parë, shqiptarët i kanë pasur rregullisht 4 deputetë dhe luftonin për 5, ndërkohë që pazari ka rënë aq shumë.

Shkak është pikërisht ndryshimi i Kodit Zgjedhor nga partia e Gjukanoviç, i cili i hoqi shqiptarëve Zonën Zgjedhore, që ishtë një normë ligjore dikur.

Met Gjoni, një gazetar i njohur në Mal të Zi, i cili është një nga politikanët e parë të shqiptareve në Mal të Zi, ka qenë deputet, zv/ambasador i Malit të Zi në Tiranë, si dhe nënkryetar i Komunës së Ulqinit.

Gjoni, kujton se shqiptarët humbën të drejtat politike që i kishin, kurse tani gjendja është komplikuar edhe më keq. Njësia Zgjedhore Shqiptare, u jepte 5 deputetë partive politike, nga ku partitë entike shqiptare merrnin 4. Pas pavarësisë së Malit të Zi kjo zonë u hoq dhe gjendja u komplikua. Aktualisht maksimumi marrin 3, por duke qenë të përçarë, ata marrin vetëm 2.

Shqiptarët e Malit të Zi janë të organizuar jo vetëm në parti etnike, por edhe në forca qytetare apo parti malazeze, siç është partia në pushtet, si dhe lëvizja opozitare e Dritan Abazoviçit. Kjo sjell ndarjen e votave dhe rënien e një deputeti.

Në vitin 1997, Gjoni thekson se kur ishte deputet ka insistuar për njësi të veçantë zgjedhore për shqiptarët në Mal të Zi.

“Mbaj mend një debat me kreun e Parlamentit të atëhershëm, kur kërkova deputetin e pestë. Svetozar Maroviç m’u përgjigj: Mendon se 4 mandate shqiptarëve nuk iu mjaftojnë?. Unë iu kundërpërgjigja që atë duhet ta japë regjistrimi i votueseve në njësinë e veçantë zgjedhore në trevat shqiptare në Mal të Zi! Kur u bë regjistrimi i votuesve, rezultoi që unë kisha të drejtë. Por njësia e veçantw zgjedhore na u hoq pa të drejtw, sepse te drejtat e fituara njëherë nuk mund të humbasin. Fatkeqësisht, kjo ndodhi pas pavarësimit të Malit te Zi, si “shpërblim” i përkrahjes pa rezervë e pa kushte nga ana e shqiptarëve”, thotë Gjoni, i cili vijon duke kritikuar partitë aktuale.

“Nuk fitohen vota me tregimin e luajitetit e besnikërisë ndaj pushtetit që na diskriminon e na varfëron, duke rrëmbyer pasurinë në trojet tona, si Kriporen , hotelet me të cilat Ulqini ishte i njohur në Evrope e më gjerë, Pyllin e pishave, Valdanosin, pyjet dhe kullosat ne Plavë e Guci etj. duke na mohuar të kaluarën tonë te lavdishme, të tashmen dhe te ardhmen e gjeneratave të reja.

Si ish-deputet, apeloj që partitë shqiptare, forcën dhe aktivitetin e vet ta orientojnë në homogjenizimin e votës shqiptare për subjektet e veta nacionale”./Gazeta Shqip