Kush e ka fajin/ Një mijë zyrtarë të kallëzuar penalisht, por korrupsioni nuk ka të sosur në Shqipëri
Pavarësisht reformave të thella në disa sektorë Shqipëria vuan nga niveli i lartë i korrupsionit. Kjo është vënë në dukje në shumë raste edhe nga diplomatë jo pak të rëndësishëm në Shqipëri, por edhe në raportet e organizmave ndërkombëtare për vendin tonë. Por, kush rezulton fajtor në luftën ndaj korrupsionit, ose hetimin e këtij krimi?!
Nëse u referohesh shifrave, duket se ato janë në kah pozitiv. Janë jo pak, por plot 1 mijë zyrtarë të akuzuar dhe dërguar për hetime vetëm nga Kontrolli i Lartë i Shtetit.
Burime zyrtare nga Kontrolli i Lartë i Shtetit bëjnë me dije se vetëm gjatë vitit 2019 janë bërë 28 kallëzime penale për 40 drejtues të nivelit të mesëm dhe të lartë.
Madje vetë Kontrolli i Lartë i Shtetit është angazhuar në 101 procese gjyqësore, nga këto 28 procese gjyqësore penale me objekt “kundërshtimin e vendimit të Prokurorisë” dhe 73 procese gjyqësore administrative dhe civile, ku KLSH ka qenë në cilësinë e të paditurit dhe personit të tretë.
Proceset gjyqësore kanë pasur një shpërndarje të madhe gjeografike, ku përfshihen gjykata si Tiranë, Durrës, Kavajë, Lushnjë, Berat, Fier, Vlorë, Përmet, Gjirokastër, Lezhë, Shkodër, Kukës, Dibër, Pukë, Mat, Tropojë, dhe Korçë.
Vetë prokuroria pranon se në harkun e 7 viteve 2012-2019, vetëm nga Kontrolli i Lartë i Shtetit janë firmosur 336 kallëzime penale për 999 persona, ose thënë ndryshe ka adresuar çdo javë një Kallëzim penal, për zyrtarët e nivelit të mesëm dhe të lartë, të konstatuar me shkelje të rënda nga auditimet e KLSH. Gjithashtu, numri i kallëzimeve penale dhe i personave të kallëzuar gjatë kësaj periudhe është 2 herë më i lartë krahasuar me periudhën 10 vjeçare 2002-2011.
Janë zhvilluar 65 procese gjyqësore ku KLSH ka qenë palë në këto procese gjyqësore, në cilësinë e personit të tretë, në lidhje me proceset gjyqësore të iniciuara, si pasojë e rekomandimeve të lëna nga KLSH në subjektet e audituar.
Vlen të theksohet se gjatë vitit 2019 janë të shumta vendimet gjyqësore, të cilat konfirmojnë rekomandimet e lëna nga KLSH në subjektet e audituar. Në proceset gjyqësore KLSH ka insistuar në monitorimin e zbatimit të rekomandimeve, arkëtimit të dëmit dhe parandalimit të efekteve negative financiare.
Adresimi i rasteve të mashtrimit e keqpërdorimi të fondeve dhe pasurisë publike nga zyrtarët e çdo niveli të qeverisjes në organet ligjzbatuese kanë forcuar profilin e KLSH-së ndaj Parlamentit dhe ka krijuar besim tek qytetari shqiptar, si një hallkë aktive në zbulimin dhe parandalimin e korrupsionit.
Gazeta Shqip