Situatë shqetësuese në vendin tonë, ndërtesat që rrezikohen nga tërmetet

Sipas Bankës Botërore, 10% e popullsisë në Tiranë dhe 6% e popullsisë në Durrës jetojnë aktualisht në ndërtesa me rrezikshmëri shumë të lartë, duke lajmëruar se ato mund shemben në rast të një tërmeti tjetër.

Dy llojet e ndërtesave që rrezikojnë më shumë janë pallatet me beton të armuar dhe ndërtesat e muratuara, të cilat mund të shkaktojnë më shumë fatalitete. Gati 50,000 njerëz, ose rreth 10% e popullsisë banojnë në ndërtesa me rrezik të lartë, analizon Banka.

Ndërsa në Durrës përafërsisht 7,000 njerëz, ose rreth 6% e popullsisë së qytetit, banojnë në lloje të ndërtesave me rrezik të lartë. Dobësia e këtyre objekteve i atribuohet mënyrës së ndërtimit dhe mungesës së mirëmbajtjes, mbikëqyrjes gjatë shumë dekadave. Studimi i fundit i Bankës Botërore analizon rrezikun nga tërmeti për familjet që jetojnë në banesa të ndërtuara para vitit 2000 dhe ofron të dhëna për shtetet në mënyrë që të përmirësojnë sigurinë e tyre.

Në lidhje me këtë çështje urbanisti Olsi Bocka tha për “Wake Up” në Top Channel se banesat nga koha e komunizmit janë në gjendje skandaloze dhe janë pikërisht këto ndërtesa që rrezikohen më së shumti nga tërmetet.

“Paketa imobiliare që kemi nga koha e komunizmit është absolutisht skandaloze nga të gjitha aspektet: estetik, termik, dhe struktural edhe për faktin se janë bërë shumë ndërhyrje pas viteve ’90 nga vetë banorët për të krijuar kushte me komode. Janë këto ndërtesa që rrezikojnë”, tha Bocka.