“Impianti nuk funksionon”, Bashkia e Elbasanit reagon ndaj akuzave: Spekulim, mbetjet i depozitojmë pa pagesë

Bashkia e qytetit të Elbasanit ka reaguar ndaj akuzave të lëshuara nga ana e Partisë Demokratike se impianti i përpunimit të plehrave nuk funksion edhe pse janë shpenzuar miliona lekë.

Në një reagim publik bashkia e Elbasanit sqaron se prej shkurtit të vitit 2016, impianti nisi operimin, ndërsa incenerimi nisi në vitin 2017. Prej këtij viti, sipas bashkisë, impianti funksionon normalisht çdo ditë.

“Që prej kësaj kohe Bashkia e Elbasanit depoziton mbetjet urbane në këtë incenerator pa pagesë, në bazë të marrëveshjes së nënshkruar mes Ministrisë së Mjedisit dhe Albtek Energy.  Që prej kësaj date impianti ka funksionuar normalisht dhe prej incenerimit të mbetjeve është prodhuar energji. Energjia e prodhuar përdoret  për nevojat e vetë këtij impianti ndërsa teprica hidhet në rrjet”, thuhet në reagimin e bashkisë.

Impianti i Përpunimit të Mbetjeve Urbane ka një kapacitet ditor të përpunimit të mbetjeve 120 tonë. Aktualisht Bashkia e Elbasanit depoziton jo më shumë se 80 tonë në ditë. Për këtë arsye, por edhe për të zgjidhur problemin e ndotjes në qark, bashki të tjera kanë nënshkruar kontratë dhe aktualisht depozitojnë mbetjet e tyre në këtë incenerator.

Bashkia e Cerrikut, Bashkia e Belshit dhe Bashkia e Librazhdit tashmë depozitojnë mbetjet e tyre në inceneratorin e Elbasanit.

“Ky incenerator, fjala e fundit e teknologjisë është i pari në Shqipëri dhe Bashkia e Elbasanit vlerëson vendimin e qeverisë dhe Ministrisë së Mjedisit që ky investim shumë i madh dhe i domosdoshëm të vinte në Elbasan. Problemi i mbetjeve urbane ka qenë një gangrenë e këtij qyteti dhe më në fund prej 3 vitesh  Elbasani merr frymë lirisht”, thuhet në reagimin e bashkisë.

Përmes Inspektoriatit të Mjedisit kryen inspektime të herë pas hershme në këtë incenerator për të parë mirëfunksionimin e tij.  Ndërsa ftohen edhe njerëzit që të monitorojnë nga afër impiantin për të shuar kështu çdo dyshim në lidhje me tezat e ngritura se nuk është në funksionim.

“Ne, por jemi të bindur që edhe kompania, janë të hapur për të gjithë skeptikët, por edhe për çdo qytetar që ka kuriozitet, të shkojnë të vizitojnë ambientet e këtij impianti, të shohim funksionimin e tij, por edhe emetimet në mjedis. Kujtojmë se edhe më mosbesuesit (në kohën që do të ndërtohej ky impiant) tashmë janë bindur se kjo ishte zgjidhja më e mirë e mundshme dhe pa ndotje për mjedisin. Kompania ka një vetmonitorim 24 orë nga kompania prestigjioze Siemens, të dokumentuar për emetimet mjedisore, por gjithashtu kontrollohet nga institucionet përkatëse”, thuhet në reagimin e bashkisë.

Në bazë të kontratës shoqëria Albtek Energy, menaxhon impiantin e përpunimit të mbetjeve urbane deri në datë 16.12.2021, më pas ky incenerator do të merret në dorëzim nga Bashkia e Elbasanit. Në qershor të vitit 2021, 6 muaj para, Bashkia e Elbasanit do të nisë procedurat për marrjen në dorëzim të tij.

Edhe gjatë emisionit të djeshëm në Opinion, në debatet me kryeministrin Rama u ngritën dyshime se ky impiant nuk funksionon. Por Rama i rrëzoi këto pretendime duke deklaruar se Impanti i Përpunimit të Mbetjeve punon dhe madje prodhon dhe energji. Ai nxori edhe foto të matësit të dritave të vendosur nga OSHEE, si një fakt ndaj analistëve skeptikë.