Pse kreu vetëvrasje Xhino? E ëma shpërthen në televizion: Neglizhencë e mjekëve në 48 orët e fundit

E ëma e Xhinos, të riut që u vetëvra duke u hedhur nga kati i tretë i Sanatoriumit, ishte e ftuar në Open ditën e sotme për të sqaruar të gjithë historikun e ngjarjes tragjike.

Ajo tha se arsyeja që e shtyu Xhinon në këtë akt ekstrem, ka qenë vetëm neglizhenca dhe mospërfillje e mjekëve në 48 orët e fundit.

“Neglizhencë dhe mospërfillje e gjendjes së Xhinos nga stafi spitalor në 48 orët e fundit. Nuk e kam nga dhimbja këtë që po them. Arrij në këtë përfundim se i kam të shkruara në Whatsapp që nga çasti që është shtruar deri në fund.

Unë jam vajzë mjeku dhe e di mirë që dhe një mjek i thjeshtë mund të lexojë frikën dhe ankthin dhe te bebja e syrit. Bëhet fjalë për një djalë 29-vjeç, një djalë që nuk pi alkool, nuk pi cigare, që ushqehet shëndetshëm. Bënte dhe palestër për t’u tonifikuar.

Përjashtoj në mënyrë absolute, sepse Xhino ishte një fëmijë i lumtur, i shkolluar, që me datë 7 maj me buxhetin e tij do shkonte në Kanada për master,” tha Lira Koço.