Basha paralajmëron Ramën: Kupa është mbushur! Do kalojë ky vit i keq dhe do rikthejmë shpresën

Kryetari i Opozitës, Lulzim Basha ka reaguar pas konferencës së fundvitit të kryeministrit Edi Rama.

Përmes një statusi në Facebook, Basha shkruan se edhe në fund të vitit, Rama bëri atë që di të bëjë: gënjeu.

“Edhe në fundi të vitit, Rama bëri atë që di të bëjë: gënjeu. Ai i ka dhënë Shqipërisë vetëm premtime boshe.  Ai gënjen kur flet për ndihmë ekonomike. Fakti është se Shqipëria është vendi që jep ndihmën më të vogël ekonomike për qytetarët e saj.  Kosto e jetesës rritet dita ditës, papunësia shtohet përditë, bizneset dhe dyqanet mbyllen dhe familjet shqiptare nuk marrin ndihmë nga qeveria. Por këto fakte nuk e pengojnë Ramën të gënjejë dhe të thote se “çdo gjë është në rregull”.”, shkruan kryedemokrati.

Duke patur parasysh edhe ndryshimet e fundit në qeveri, kryedemokrati shprehet se kupa është mbushur dhe Shqipëria ka nevojë për ndryshim/

“Kur i mohon problemet ku je zhytur, si mund t’i zgjidhësh ato?
Kupa është mbushur! Pas 7 vitesh dështime, Rama mund të ofrojë vetëm dështime të tjera më të mëdha. Shqipëria ka nevojë për ndryshim. Shqipëria ka nevojë për shpresë të re. Shqipëria ka nevojë për një qeveri që kujdeset për popullin, jo një qeveri që kujdeset për veten. Ky vit i keq do të kalojë dhe ne sëbashku do t’i kthejmë shpresën Shqipërisë.”, shkruan Basha./ Gazeta SHQIP