“Edhe ai e njeh vetminë e Kryeministrisë”- Rama flet për marrëdhënien me Fatos Nanon

Kryeministri Edi Rama, ndërsa foli për raportin me ish-kryetarin e Partisë Socialiste Fatos Nano, e cilësoi atë “shumë të bukur”.

Gjatë një interviste për emisionin “Opinion”, Rama tha se për herë të parë në Kryeministri ka hyrë kur atë e drejtonte Fatos Nano, ndërsa shtoi se me të nuk komunikon intensivisht, por herë pas here.

Sipas Ramës, pjesa e bukur e raportit me Nanon është fakti që edhe ai ka qenë në kryeministri, “dhe ai e di edhe fizikisht se çfarë do të thotë presion i kësaj zyre”.

“Të them të drejtën raportin sot mund ta quaj të bukur. Komunikojmë jo intensivisht, hera -herës, por ajo që është pjesa e bukur e raportit është që ai ka qenë këtu, dhe ai e di edhe fizikisht se çfarë do të thotë presion i kësaj zyre. Dhe mbi të gjitha ai dhe besoj dhe të tjerët që kanë qenë këtu, e dinë se ç’është vetmia në këtë zyrë. Kjo zyrë ka shumë vetmi. Njerëzit mendojnë se kur hipën në majë, je i rrethuar me një mori njerëzish. Në fakt, në majë je më vetëm se askush tjetër. Sepse kur vjen koha e momenteve të vështira, je komplet vetëm. Për këtë arsye, eksperienca, ndjesia fizike e të jetuarit në këtë zyrë, sfidat, sfilitjet, përplasjet edhe ajo që kemi kaluar me njëri-tjetrin na e kanë bërë këtë raport shumë të bukur”, tha Rama.