Të tjera ndryshime në Qeveri/ Lëvizje në rang zëvendësministrash, ja kush ikën dhe kush vjen

Të tjera ndryshime në Qeveri, pasi kryeministri Edi Rama njoftoi emërimin e Olta Xhaçkës në krye të Ministrisë së Jashtme, pas dorëheqjes së Gent Cakaj, ndërsa i besoi postin e ministrit të Mbrojtjes Niko Peleshit. Lëvizjet e radhës janë në nivel zv/ministrash.

Me vendim të Këshillit të Ministrave, është liruar nga detyra zëvendësministri i Infrastrukturës dhe Energjisë, Artan Shkreli, ndërsa në vend të tij është emëruar Gjergji Simaku.

Mësohet se Shkreli do të jetë kreu i Institutit të Ndërtimit.

Po ashtu, është liruar nga detyra edhe zëvendësministri për Evropën dhe Punët e Jashtme, Sokol Dedja. Ndërkohë është emëruar zëvendësministër i Brendshëm Andi Mahila.

Andi Mahila aktualisht është Administrator i UMT. Po ashtu ai ka mbajtur edhe postin e konsullit të Shqipërisë në Athinë.

Këto ndryshime mbajnë firmën e zv.kryeministrit Erjon Braçe dhe mbajnë datën 24 dhjetor.

Këto lëvizje në qeveri vijnë vetëm katër muaj para mbajtjes së zgjedhjeve të përgjithshme në vend, më 25 prill.