“Shqipërisë po i ikin intelektualët”- Meta: 25 prilli vendimtar për të ardhmen e vendit

Presidenti Ilir Meta, ndërsa citon një raport të Organizatës për Bashkëpunim Ekonomik dhe Zhvillim të viti 2020, thotë se vendi ynë renditet i katërti në botë për emigracionin e intelektualëve.

Me një shënim në facebook, Meta thotë se largimi i “ajkës” së shoqërisë,  “është një tjetër tregues i dhimbshëm” se nga Shqipëria po largohen edhe qytetarët, që kanë një standard të mirë jetese.

Ndërsa i konsideron zgjedhjet e 25 prillit si “referendum”, Meta thotë se janë e vetmja shpresë “për të ardhmen e Shqipërisë, jo vetëm për 4 vite, por për dekadat që vijnë”.

Postim i plotë:

Një tjetër rekord i zi! Sipas raportit të vitit 2020, të Organizatës për Bashkëpunim Ekonomik dhe Zhvillim (OECD) Shqipëria renditet e 4-ta në botë për emigracionin e personave me aftësi të larta në punë dhe e 8-ta në botë për normën e largimit të intelektualëve.

Largimi i “ajkës” së shoqërisë, është një tjetër tregues i dhimbshëm se nga Shqipëria po largohen edhe qytetarët, që kanë një standard të mirë jetese, marrin një pagesë të kënaqshme dhe kanë një pronë, por për të cilët niveli i shërbimeve publike është i papranueshëm, ndjehen pa zë, të papërfaqësuar, të pafuqishëm për të ndryshuar gjendjen në vend dhe të pashpresë për të ardhmen e fëmijëve të tyre.

Referendumi i 25 prillit 2021 është vendimtar për të ardhmen e Shqipërisë, jo vetëm për 4 vite, por për dekadat që vijnë.

Është një mundësi për të rikthyer standardet cilësore të shërbimeve, respektin dhe dinjitetin njerëzor, për ta bërë Shqipërinë një vend të jetueshëm për të gjithë, me mundësi dhe shpresa të reja, veçanërisht për rininë.

Me shpresë dhe besim, të bashkohemi e të marrim në dorë fatet tona për të ndryshuar këtë realitet, që po shkatërron familjet dhe po plak Shqipërinë, për të ndërtuar këtu të ardhmen e sigurt dhe europiane për të gjithë.

Shqipërisë po i ikin intelektualët, OECD: E katërta në botë për rritjen e emigracionit të njerëzve të aftë: