Vrasja e Klodian Rashës/ Dalin të tjera detaje, 25-vjeçari u përplas fizikisht me efektivin e policisë

Të tjera detaje janë publikuar në lidhje me vrasjen e 25-vjeçarit Klodian Rasha, i cili u qëllua për vdekje nga efektivi i policisë, Nevaldo Hajdaraj.

Duke iu referuar hetimeve të prokurorisë, “News24” raporton se mes Rashës dhe efektivit të “Shqiponjave” ka patur një përplasje fizike.

Prokuroria ka zbuluar se efektivi i forcave Shqiponja, Nevaldo Hajdaraj, është përplasur fizikisht me viktimën përpara se ta qëllonte për vdekje me dy plumba pas shpine, në rrugicën e shtëpisë së tij, teksa Rasha kishte dalë jashtë banese në shkelje të rregullave anti-covid.

Ky fakt është zbuluar nga këqyrja e kamerave të sigurisë. Në pamje shihet qartë që Nevaldo Hajdaraj, i cili ishte vënë në ndjekje të të riut, e ka arritur atë dhe e ka kapur nga duart. Por, personi që më vonë u identifikua si Klodian Rasha, ka mundur t’i shpëtojë nga duart dhe të largohet.

Në këtë moment, Hajdaraj e ka qëlluar për vdekje. Nisur nga kjo provë e re, prokuroria thotë se efektivit i policisë duhet të përgjigjet për akuzën e vrasjes me dashje, pasi fakti që ai i ka kapur duart, ai e ka patur të qartë që po qëllonte një person të paarmatosur. Që viktima dhe autori u përplasën fizikisht, ishte pohuar më herët nga Erion Gj, kolegu i Nevaldo Hajdaraj, i cili gjithashtu u vu në ndjekje të të riut, që s’iu bind urdhrit për t’u ndaluar.

Ai shprehej në dëshminë e tij se në momentin që ata u përplasen fizikisht, pa Nevaldon që u rrëzua dhe teksa po ngrihej dëgjoi dy krisma arme. Klodian Rasha u qëllua për vdekje në orët e para të mëngjesit të 8 dhjetorit të 2020. Pranë vendit ku ai mbeti i vrarë, u gjet një pistoletë, që rezultoi se nuk i përkiste 25-vjecarit. Vrasja e Rashës u pasua me protesta dhe u bë shkak për largimin e Sandër Lleshaj nga posti i ministrit të Brendshëm.