Frikë nga numri i shqiptarëve, opozita maqedonase mbledh firma kundër regjistrimit të popullsisë, reagon Zaev
Regjistrimi i popullsisë në Maqedoninë e Veriut po shkakton përplasje të forta, pasi do të ketë përcaktohet dhe numri reali i shqiptarëve në shtetin fqinj.
Partia VMRO-DPMNE ka nisur të shtunën mbledhjen e nënshkrimeve për shtyrjen e regjistrimit të popullsisë në Maqedoninë e Veriut, të paraparë për muajin prill.
Opozita maqedonase, sipas REL, pretendon se partitë në pushtet kanë kurdisur rezultatet e regjistrimit sa i përket përqindjes së shqiptarëve në shtet dhe se me një veprim të tillë, sipas saj, nuk do të ketë operacion statistikor, por politik.
“Regjistrimi është një operacion statistikor, dhe si i tillë duhet të bazohet në një metodologji dhe proces që do të tregojë rezultate reale, dhe jo false, të bazuar në marrëveshje koalicioni. Pas përgjigjes masive të qytetarëve kundër regjistrimit,(kryeministri Zoran) Zaev duhet menjëherë të tërhiqet nga ideja e regjistrimit në prill”, thuhet në një komunikatë të VMRO-së, e cila pretendon se vetëm të shtunën janë grumbulluar mbi 25,000 nënshkrime të qytetarëve.
Kryetari i kësaj partie Hristijan Mickoski ka akuzuar qeverinë për “rrënimin e shtetit dhe varfërimin e qytetarëve”.
“Imagjinoni për katër vjet ne u zhytëm në këtë kënetë dhe baltë politike. Nuk bënë asnjë projekt nga fillimi deri në fund. Imagjinoni si do të duket ky regjistrim i bërë për 20 ditë, sipas një recete të shkruar nga Zoran Zaev dhe LSDM? Unë ju them, ky është një turp i madh”, ka deklaruar Mickoski.
Sipas ligjeve në fuqi, opozita duhet të mbledhë mbi 30,000 nënshkrime për të rikthyer debatin për Ligjin e regjistrimit të popullsisë, por kjo nuk nënkupton me automatizëm dhe shtyrjen e procesit, pasi shumica parlamentare sërish mund të votojë të njëjtin ligj, që i jep formën e prerë regjistrimit të popullsisë.
Lidhja Social-Demokrate e kryeministrit Zoran Zaev, ka thënë se asnjë nismë e opozitës nuk do të mund të shtyjë regjistrimin ndërsa sipas saj, “VMRO me këtë hap synon të fshehë pakënaqësitë brenda saj”.
“VMRO-DPMNE me Hristijan Mickoskin janë parti anti-njerëzore, që punojnë kundër qytetarëve dhe kundër shtetit. Prandaj, është e qartë se nisma e Mickoskit është vetëm për përdorim brenda partiak dhe interesa personale. Përpjekjet e VMRO-DPMNE-së, për të bllokuar këtë proces të rëndësishëm për qytetarët dhe për të ardhmen e vendit, nuk do të kenë sukses”, thuhet në reagimin me shkrim të LSDM-së.
“Ne nuk guxojmë dhe nuk duhet të lejojmë të mos kemi një regjistrim për dhjetë vitet e ardhshme. Nëse jemi një vend që nuk kemi bërë regjistrim për 20 vjet, duhet ta bëjmë një orë e më parë. Unë jam i bindur se do të kemi një regjistrim të suksesshëm nga 1 deri më 21 Prill, siç është planifikuar”, tha Zoran Zaev, kur u pyet për të komentuar iniciativën e partisë opozitare VMRO-DPMNE për mbledhjen e nënshkrimeve për anulimin e Ligjit të Regjistrimit.
Zaev u shpreh se Ligji për regjistrimin e popullsisë është në përputhje me Eurostat dhe të gjitha standardet ndërkombëtare dhe se është një operacion statistikor, duke shtuar se çdo lloj bllokimi, çdo shpërqendrim i qytetarëve ose vendosja e pasigurisë, nuk është aspak një veprim patriotik ndaj shtetit.
Maqedonia e Veriut regjistrimin e fundit e ka mbajtur në vitin 2002. Në vitin 2012 kishte një përpjekje për regjistrimin e popullsisë, por ai ishte ndërprerë disa ditë pasi kishte nisur për shkak të mosmarrëveshjeve lidhur me regjistrimin e diasporës shqiptare.
Sipas regjistrimit të fundit, Maqedonia e Veriut ka rreth 2 milionë banorë, prej tyre, 25.17 për qind janë shqiptarë.