“Iku se mendoi se ra shteti”, Neritan Ceka reagon ndaj akuzave të Fatos Nanos: Fantazi! Të burgosurit u kthyen vetë në qeli sa erdhi FNSH-ja

Ish-ministri Neritan Ceka përgjigjet pas akuzave që ka bërë dje ish-kryeministri Fatos Nano. Ky i fundit në “Opinion” u shpreh se kur shpërtheu revolta në burgun e Tiranës, Neritan Ceka la detyrën dhe iku në shtëpi sepse mendoi se ra shteti.

Por vetë Ceka i ka quajtur këto akuza fantazi të ish-kryeministrit.

Është thjesht fantazi, sepse revolta në burgun e Tiranës ishte nga të burgosur ordinerë dhe jo politikë. Askush nuk doli nga burgu dhe policia ruajti kontrollin nga jashtë. Natyrisht duheshin Forcat e Ndërhyrjes së Shpejtë FNSH për të hyrë brenda.

Sapo erdhi FNSH të burgosurit u kthyen vetë nëpër qeli nga frika. Kështu nuk pati asnjë të goditur, jo pastaj të vrarë. Operacionin e drejtonte Sokol Bare, drejtori i përgjithshëm i policisë dhe ministri nuk merrej me drejtim”, ka thënë ai për Noa.al.

Deklarata e Fatos Nanos per Cekën:

Dhe mua më duhej të zhvendosesha nga kontrolli i një përpjekjeje për të shpërthyer burgun e Tiranës siç ndodhi në Mars ‘98 tek situata në brigadën ushtarake të Shkodrës ku kishin sulmuar për të vjedhur armët. Do thuash kur ngele vetëm?

Në momentin që unë dhe Ndre Legisi që ishte sekretar i shtetit, po komunikonim pa ndërprerë telefonikisht për masat që duhej të merrnim, ishte e nevojshme të prisnim sepse FNSH ishin në Shkodër dhe u duhej 2 orë të vinin nga Shkodra në Tiranë dhe mbi të gjitha ishin specialistë që njihnin planimetrinë e burgut dhe dinin të vepronin në këto lloj situatash.

Në orën 9 në mbrëmje, në një nga telefonat me Ndrekën, Ndreka më thotë: Neritani iku, ministri, Më dorëzoi telefonin dhe çelësat dhe më tha: Ika se ra shteti.

Dhe iku vërtet. Dhe unë vazhdova me Ndrekën derisa me ndihmën e radio “Kohës”, bëmë një fushatë diversioni pozitive në mes të të rebeluarve dhe e ndamë shapin nga sheqeri, derisa u kthen FNSH nga Shkodra.

Dhe sa kisha rënë të fle në 5 të mëngjesit më merr Neritani, ministri dhe më thotë: E zgjidhëm ne situatën.  Në raste të tilla ngelesh vetëm. Nivelin e  përgjegjësisë që i takon Kryeministrit, nuk e merr askush tjetër.

Back to top button
LAJMET E FUNDIT