Është kundër martesave mes gjinisë së njëjtë, dy organizata i kërkojnë Kurtit shkarkimin e zëvendëskryeministres
Aktivistët e komunitetit LGBTIQ+ duan shkarkimin e menjëhershëm të zëvendëskryeministres, Emilija Rexhepi. Aktivistët i kanë bërë kërkesë kryeministrit të Kosovës, Albin Kurti, që të bëjë të mundur një gjë të tillë.
Arsyeja? Lidhet me një deklaratë të politikanes nga komuniteti boshnjak, të bërë para dy vitesh. Në një prononcim për mediat ajo ka deklaruar se është kundër martesave mes gjinisë së njëjtë.
“Dylberizm” dhe “Replikë” janë dy organizata të aktivistëve për mbrojtjen e të drejtave të komunitetit LGBTIQ+. Sipas tyre, qëndrimi i Rexhepiut dëshmon se ajo ka qëndrime homofobeje.
“Ne si Dylberizm dhe Replikë kërkojmë nga kryeministri Kurti shkarkimin e menjëhershëm të Emilija Red?epi nga kjo pozitë, si dhe emërimin e një personit që kauzën për të drejtat e njeriu e ka të përbrendësuar në mendime dhe veprime, pa përjashtime”, thuhet në reagim.
Sipas këtyre dy organizatave, Rexhepi nga Partia NDS, gjatë vitit 2019 në intervistën dhënë për Kallxo.com, është deklaruar se është kundër martesave mes gjinisë së njëjtë.
“Kjo dëshmon që Zëvendëskryeministrja e Kosovës, e caktuar për të punuar në çështjet e të drejtave të njeriut, ka qëndrime homofobike dhe nuk beson në barazi për të gjithë njerëzit. Emërimi i një homofobeje në pozitën e zv. Kryeministres për çështje të pakicave dhe të Drejtave të Njeriut është tejet shqetësuese dhe e rrezikshme për respektimin e të drejtave të njeriut, më saktësisht të drejtat e komunitetit LGBTIQ+”, vazhdon reagimi i këtyre aktivistëve.
Gjithashtu “Dylberizm” dhe “Replikë” mendojnë se emërimi i Rexhepit në pozitën e zëvendëskryeministres e rritë shtypjen dhe diskriminimin që po u bëhet personave të komunitetit LGBTIQ+.
“Duke pasur parasysh shtypjen sistematike dhe rrethanat homofobike e transfobike me të cilat komuniteti LGBTIQ+ përballet çdo ditë në shoqërinë tonë, emërimi i saj në këtë pozitë vetëm sa e rritë shtypjen dhe diskriminimin që i bëhet personave LGBTIQ+ nga institucionet dhe shoqëria kosovare, dhe lë hapësirë për shqetësim të kthimit mbrapa të punës shumëvjeçare të institucioneve dhe shoqërisë civile mbi avancimin e të drejtave LGBTIQ+ në vend”, thuhet në reagim.