Rama: Se s’të pëlqen Edi Rama, punë e madhe, nëse s’të pëlqejnë çitjanet e mia mos i vish! Shiko punën jo gunën!

Kryeministri Edi Rama i është drejtuar të gjithë zgjedhësve të 25 prillit që të mendojnë mirë se kujt do t’ia jap votën.
Gjatë fjalës së tij, nga tarraca e Bashkisë së Tiranës, Rama tha se nëse nuk të pëlqen kryebashkiaku Erion Veliaj, mund të ndërrosh kanalin e televizorit.
Më tej ai u shpreh se edhe nëse s’të pëlqejnë çitjanet e tij, mos i vesh, por duhet vlerësuar puna dhe jo guna.
“Të mos e mendosh për asnjë lloj arsye që të votosh ata që e bënë Tiranën copash. Nuk ka asnjë arsye në botë. Se nuk të pëlqen Edi Rama, punë e madhe shumë. Nuk të pëlqen Lali, çfarë problemi ka. Lali është gjëja më e kollajshme. Merr telekomandën, shtyp sustën dhe zhduket Lali nga televizori, nuk e sheh fare. As unë, as Lali askush tjetër nuk kemi dalë të kërkojmë nuse, as të bëjmë krushqi, as për paradën mode. Nuk të pëlqejnë çitjanet e Edi Ramës, çfarë problemi ka. Mos i vish. Lërja Edi Ramës t’i mbajë çitjanet. Ama kur vjen puna për të vlerësuar punën, do merresh me gunën, apo me punën.
Është shumë e thjeshtë”,- tha Rama.