Ambasadorët zbarkojnë në Elbasan: Jo sulme dhe kërcënime në fushatë, do jemi aty edhe ditën e zgjedhjeve

Ambasadori i BE-së, Luigi Soreca ishte sot në Elbasan së bashku me ambasadorët e Francës dhe Gjermanisë në vendin tonë.

Delegacioni i BE-së në Tiranë ka shpërndarë mesazhin e Sorecës pas vizitës që ishte i qartë, “jo sulme dhe kërcënime” dhe se ditën e zgjedhjeve do të rikthehen sërish në Elbasan.

Ata kanë zhvilluar takime me Taulant Ballën, Gazment Bardhin dhe Rudina Hajdarin, përfaqësues të PS, PD dhe Nismës Thurje.

“Takime të mira sot në Elbasan me Taulant Ballën, Gazment Bardhin dhe Rudina Hajdarin, përpara zgjedhjeve të 25 prillit, së bashku me ambasadorët Elisabeth Barsacq dhe Peter Zingraf.

Përsëritëm se është thelbësore që zgjedhjet të jenë të lira, të drejta dhe transparente dhe se fushata të përqendrohet mbi nevojat e qytetarëve shqiptarë, pa sulme dhe kërcënime. Unë do të kthehem në Elbasan ditën e zgjedhjeve së bashku me kolegët e mi të vendeve anëtare të BE-së në disa  qendra votimi.

Këto zgjedhje janë të rëndësishme për qytetarët shqiptarë, por edhe për BE-në dhe për të ardhmen e Shqipërisë” shkroi ai.

Më herët në Elbasan kanë qenë edhe ambasadorët e SHBA-së dhe Britanisë së Madhe.