Habit Albin Kurti, dje akuzonte se ishte projekt i Rama-Vucic, sot ndryshon mendje dhe firmos Shengenit Ballkanik

Albin Kurti ka kundërshtuar fort idenë e Shengenit Ballkanik, një nismë e Shqipërisë, Serbisë dhe Maqedonisë së Veriut e mbështetur nga Bashkimi Europian e Gjermania në kuadër të Procesit të Berlinit.

Atëherë në opozitë, Albin Kurti e ka cilësuar këtë ide si ide të Beogradit që dëmton shqiptarët në Shqipëri e Kosovë. Por, sot Kryeministër, Kurti ka miratuar një marrëveshje që u siguron lëvizje të lirë qytetarëve të Kosovës me pesë vendet e rajonit, njëra prej katër shtyllave të Shengenit Ballkanik.

“Më lejoni t’ju prezantoj nismën për lidhjen e marrëveshjes ndërkombëtare për lirinë e lëvizjes dhe qëndrimit të shtetasve të Shqipërisë, Bosnje dhe Hercegovinës, Maqedonisë së Veriut, Malit të Zi dhe Serbisë. Kjo draft-marrëveshje është në frymën e interesave të përbashkëta në kuadër të bashkëpunimit rajonal si rezultat i zotimeve të gjashtë liderëve të Ballkanit Perëndimor në Samitin e Sofjes të mbajtur në nëntor 2020 ku u nënshkruan dy deklarata, ajo për tregun e përbashkët rajonal dhe deklarata për agjendën e gjelbër dhe vazhdimësi i procesit të Berlinit”, deklaroi ministri i Brendshëm i Kosovës, Xhelal Zveçla.

Ai tha se qytetarët e palëve të përfshira në marrëveshje do të kenë të drejtë që lirshëm të kalojnë dhe të qëndrojnë në territorin e palëve për periudhën kohore të përcaktuar në këtë marrëveshje.

Lëvizja e lirë e qytetarëve është një nga shtyllat e idesë së Shengenit Ballkanik, që përfshin veç kësaj edhe lëvizjen pa pengesa të mallrave, të kapitalit dhe shërbimeve.

Kreu i komanduar i Partisë Demokratike të Kosovës e ka sulmuar fort sot Albin Kurtin, me “armët” e Vetëvendosjes.

“Kryeministri Albin Kurti ende pa e nisur zyrtarisht dialogun me Serbinë, sot paska marrë vendim për nisjen e zbatimit të mini-shengenit ku Kosova nuk trajtohet e barabartë me vendet e rajonit.

Kohë më parë kur ishte në opozitë, këtë nismë rajonale Albini e quante Jugosllavi e re. E pra tani me dorën e tij e nisi Jugosllavinë e re andaj urime Albin!”, shkruan Enver Hoxhaj, kryetari i PDK.

Back to top button
LAJMET E FUNDIT