Mediat e huaja jehonë Ambasadores: SHBA është kundër uljes së Sali Berishës në karrigen e Kuvendit në shtator

Ambasadorja amerikane Yuri Kim, pas takimit të sotëm me kreun demokrat Lulzim Basha, duke folur për mediat la të kuptohet qartë se ajo i ka kërkuar atij që ish-lideri i partisë, Sali Berisha të mos jetë në parlamentin e ri në shtator.

Mediat e huaja kanë raportuar zhvillimet e fundit politike në vend, dhe konkretisht takimin e fundit mes diplomates dhe Lulzim Bashës.

“Toronto Star” duke cituar “The Associates Press” thotë se SHBA i kanë bërë presion Partisë Demokratike që të përjashtojë nga ulëset e Parlamentit të ri në shtator, ish-liderin e saj Sali Berisha, të cilit Uashingtoni i ka ndaluar hyrjen në SHBA, me arsye si i përfshirë në korrupsion madhor.

Basha ende nuk ka reaguar lidhur me takimin me Yuri Kim apo deklaratën e saj për mediat, por Berisha ka reaguar dy herë sot, me anë të një njoftimi për shtyp dhe në mbrëmje në një intervistë për gazetaren Beti Njuma.