LSI drejt “shkrirjes”, Monika Kryemadhi braktis kampin e LRI në Jalë

Pavarësisht humbjes së thellë më 25 prill, LSI ka vijuar me traditën, duke mbledhur edhe këtë vit në një kamping në Jalë të rinjtë mbështetës të kësaj partie.

Por ajo që bie në sy është mungesa e kryetares së LSI, Monika Kryemadhit, ndërsa të pranishëm ishin Petrit Vasili, Endrit Braimllari, Erisa Xhixho e Floida Kërpaci.

Kryemadhi ka transmetuar live në Facebook organizimin, por pa sqaruar arsyet se pse mungonte në këtë aktivitet, hera e parë që ndodh një gjë e tillë.

Kjo mungesë e Kryemadhit shton edhe më shumë pikëpyetjet për pozicionin e saj në këtë parti dhe nëse do të vijojë ta udhëheqë sërish atë edhe pas difatës së 25 prillit.

Prej kohësh, Kryemadhi nuk është shfaqur në publik dhe nuk ka bërë asnjë deklaratë në lidhje me shumë çështje të rëndësishme në vend.

Në mungesë të Kryemadhit, ai që ka folur para të rinjve ishte Petrit Vasili, që kërkoi rezistencë nga ata.

“I kërkoj qeverisë të marrë masa për Covid-19. E dini se çfarë ndodhi. Kufizimet ishin vetëm propagandë, por mijëra njerëz humbën jetën. Qindra mijëra të tjerë e kanë kaluar me probleme të mëdha. Kanë marrë para borxh për të përballuar.

Ky është realitet. Kush do i japë përgjigje? Këtë përgjigje duhet ta japim ne vetë. Do të vijë në kamp si djalë e një vajzë të re, por do të dalë nga këtu si një djalë dhe një vajzë me mendjen e një qëndrestari.

Nuk mund të rrimë në facebook, ku na kërkohet të jemi në majë të qëndresës për të siguruar të ardhmen. Koha është e vështirë, kërkon njerëz që luftojnë dhe një luftëtar i mirë nuk njeh moshë. Në LSI, që në 2008, ka qenë sërish në opozitë. Luftoi që të rinjtë të mos iknin nga malet e nga kodrat.

Në rast se do të harroni, sepse s’keni ardhur për të kaluar disa ditë interesante, por duhet të mendoni gjatë sepse duhet të ktheheni me një mendim e karikim të ri, që muajt që na presin të jemi së bashku”, tha Vasili.