Skandali i rrjedhjes së pagave/ Reagon dhe Meta: Akt kriminal që rrezikon paqen sociale

Presidenti Ilir Meta me anë të një reagimi zyrtar e cilëson si një akt kriminal dhe që cenon paqen sociale rrjedhjen e të dhënave personale me pagat e mbi 630 mijë shtetasve shqiptarë.

“U njoha nga mediat për daljen në publik, të një liste me të dhënat sensitive personale të 637,138 qytetarëve të punësuar, në shkelje flagrante të lirive, të drejtave dhe dinjitetit njerëzor, të ligjeve dhe të Kushtetutës, një rast paligjshmërie i përsëritur, pas skandalit të patronazhistëve. Të dhënat personale të çdo shtetasi, që depozitohen në institucionet publike dhe që administrohen në bazat e të dhënave shtetërore, janë personale, mbrohen me ligj dhe kanë për qëllim përdorimin e tyre vetëm për interesin e shtetasve dhe të shtetit. Çdo lloj përdorimi i ndryshëm i tyre është akt kriminal, që rrezikon paqen sociale duke cënuar sigurinë private të çdo qytetari”, shprehet presidenti.

Ai kërkon gjithashtu nisjen e një hetimi të plotë nga agjencitë ligjzbatuese për të garantuar mbrojtjen e të dhënave personale.

“I bëj thirrje agjencive ligjzbatuese dhe të ndjekjes penale, të vihen menjëherë në lëvizje, të nisin verifikimet dhe hetimet, të faktojnë këtë veprimtari të përsëritur të paligjshmërisë, duke marrë pa vonesë masat e nevojshme për të garantuar mbrojtjen e të dhënave personale dhe vënien përpara përgjegjësisë të autorëve”, shprehet kreu i shtetit./ Gazeta Shqip