Tragjedia në malin e Munellës/ Gjendet i pajetë alpinisti i zhdukur në grupin e gazetarit Alfred Lela

Ka rezultuar tragjik udhëtimi i 5 alpinistëve pasditen e djeshme në zonën e Pukës. Në grupin, në mesin e të cilëve ishte dhe gazetari i Top News, Alfred Lela, ndërroi jetë një prej tyre ndërkohë që një tjetër është në gjendje të rëndë.

Alpinisti që ndërroi jetë është Ndoc Mula, ndërkohë që personat e tjerë janë lënduar. Mbi 60 forca ushtarake shkuan menjëherë në vendngjarje për të shpëtuar alpinistët, dhe pas orësh kërkimesh u gjet dhe trupi i pajetë i Ndoc Mulës.

Gazetari Alfred Lela, bashkë me  Ilir Shytin, Ndoc Mulën, Dorian Malajn dhe Gisel Dollanin ishin duke eksploruar në Malin e Munellës në Pukë, kur aksidentalisht si pasojë e një stuhie, siç thotë vetë gazetari Lela, ata janë rrëzuar në humnerë duke humbur kontaktin me njëri tjetrin.

Pas ngjarjes, është njoftuar policia e cila dërgoi në terren disa forca nga komisariati i Pukës, 23 forca të repartit ushtarak të Vaut të Dejës dhe forcat e Ministrisë së Mbrojtjes. Në total kanë qenë rreth 60 persona të cilët janë angazhuar në kërkim të grupit të alpinistëve.

Gjatë kërkimeve, pas pak orësh u gjet Ilir Shyti, i cili kishte pësuar dëmtime të shumta dhe është dërguar me urgjencë në Tiranë. Personat e tjerë pësuan dëmtime më të lehta.

Ndërkohë, Ndoc Mula është gjetur pas më shumë se 10 orësh kërkime, për shkak se terreni dhe moti ishin të pafavorshëm për kërkimet.