Ambasadori rus i prerë: Sulmet në Ukrainë do ndalojnë kur të arrihen qëllimet tona

Një ditë pasi Franca dhe Meksika thanë se do të kërkonin miratimin e Asamblesë së Përgjithshme të Kombeve të Bashkuara për një rezolutë humanitare për Ukrainën, ambasadori rus zbuloi se Moska po dorëzonte rezolutën e saj në Këshillin e Sigurimit të OKB-së.
Rusia ka kundërshtuar projekt-rezolutën fillestare në Këshillin e Sigurimit, ku ka të drejtën e vetos, raporton CNN.
Kur u bë presion mbi detajet e kushteve të zgjidhjes, ambasadori rus në OKB, Vassily Nebenzia tha se Rusia do të bënte gjithashtu thirrje për demilitarizimin e Ukrainës për të mos pasur asnjë kërcënim të ardhshëm nga Kievi ndaj Rusisë dhe se Ukraina nuk do duhej të anëtarësohet në NATO.
Nebenzia tha gjithashtu se presidenti rus Vladimir Putin do të ndalojë sulmin ndaj Ukrainës “kur të arrihen qëllimet e operacioneve speciale ushtarake”.