Bumçi: Berisha ka një mal me vlerësime sa mali i Dajtit, “non grata” letër pa asnjë fakt, ne jemi proamerikanë

Anëtari i Komisionit të Rithemelimit të PD, Aldo Bumçi e konsideroi të pavlefshme shpalljen “non grata” të ish-kryeministrit Sali Berisha nga SHBA duke shtuar se ish-kreu i PD ka një numër të madh vlerësimesh sa mali i Dajtit. Ai kërkoi që SHBA të respektojë vendimet e demokratëve dhe qytetarëve shqiptarëve në Kuvendin e 11 dhjetorit 2021, referendumin e 18 dhjetorit 2021, zgjedhjet e pjesshme lokale të 6 marsit dhe të Gjykatës së Tiranës në 25 mars.“

‘Non grata’, kemi një mal sa ai i Dajtit me vlerësime për Berishën dhe një letër pa asnjë fakt, pa asnjë gjë. Raportet amerikane për qeverinë Berisha dhe qeverinë Rama nuk mund të krahasohen. Demokratët e votuan Berishën, nuk u votua vetë. Nuk është Berisha çështja. Po kërkoj të respektojnë vendimin e qytetarëve të një vendi demokratik”, tha Bumçi.

Më tej, ish-ministri demokrat shtoi se pavarësisht sulmeve të ambasadës së SHBA, PD zyrtare dhe mazhorancës se “Foltorja” është anti-amerikane, Komisioni i Rithemelimit është pro-vlerave demokratike të SHBA. Sipas tij, meqë DASH dhe ambasadorja Yuri Kim po ndërhyjnë në PD, kjo nuk do të thotë se parimet e demokracisë amerikane dhe dashuria e shqiptarëve për SHBA nuk ekzistojnë.

“Nuk mund të jetë amerikane shprehja ‘opozita është problemi’, kjo është diktatoriale. Diktaturat i duan opozitat të dobëta. Putin merret me opozitën, ka vrarë drejtuesit e saj. Ne jemi pro-amerikanë. Demokratët vijnë nga ato shtresa që dëgjonin VOA, që ishin të përndjekur. Proamerikanizmi nuk varet nga diçka që ata nuk kanë arritur të bindin asnjë shqiptar”, deklaroi Aldo Bumçi.