“Çmimet do vijojnë të rriten”/ Tabaku: Askush nga ne nuk pi më ujë nga çezma

Deputetja e PD, Jorida Tabaku ka sjellë në vëmendje të deputetëve në seancën e sotme të Kuvendit problemin e furnizimit me ujë të pijshëm në vend, si dhe rritjen e çmimit për këtë shërbim.

Tabaku deklaroi se sot askush nuk mund ta pijë ujin nga çezma, ndërsa rikujtoi dhe banorët e Krujës që u helmuan vitin e kaluar.

Por, ndër të tjera Tabaku u shpreh se sot demokratët nuk janë në formën më të mirë por kurrsesi nuk u mungon guximi për të thënë gjërat në sy.

“Është fatkeqësi e madhe të jesh nëntë vite në qeveri dhe ta krahasosh veten si ishim 9 vite më parë. Qeveria vjen këtu dhe na sulmon ne që kemi 8 vite në opozitë. PD sot nuk është në situatën më të mirë. Është e kotë të gënjejmë veten dhe të themi jemi shumë mirë. Por guximin për të thënë gjërat në sy e kemi.

Qytetarët shqiptarët e presin këtë. Asnjë nga ne këtu në parlament nuk e hap çezmën dhe të pijë nga çezma. Qeveria kur e kupton një gabim edhe mund të kërkojë ndjesë. Pritet edhe një rritje e re e çmimit të ujit në Tiranë. Para pak javësh u miratua edhe raporti i ERRU-së që tha se do të kemi një rritje në çmimin e ujit.

Në atë moment u tha që nuk do ketë më rritje të tjera. Të vish këtu dhe të thuash që nuk është rritur çmimi i ujit dhe nuk është rritur çmimi i energjisë kur në vitin 2013 e rritën çmimin e energjisë për 500 mijë familje. Sot vijnë dhe thonë, do prezantojmë një fazë tjetër”, deklaroi Tabaku.