Zbulohet marrëveshja/ Dy anije prodhuese në Vlorë do sigurojnë energji elektrike gjatë verës

Ministrja e Infrastrukturës dhe Energjisë Belinda Balluku, në mbledhjen e zhvilluar në Komitetin e Energjisë dha lajmin e mirë për qytetarët se nuk do ketë ndërprerje energjie apo rritje çmimesh.
Më tej ajo zbuloi marrëveshjen e arritur për sigurinë energjetike, falë ankorimit të dy anijeve prodhuese të energjisë elektrike në Triport të Vlorës.
Këto dy anije janë marrë me qira dhe do të qëndrojnë deri sa TEC-i të vendoset në punë.
Sipas Ballukut këto anije do të sigurojnë një pavarësi energjetike dhe gjatë verës, ndërsa theksoi se kjo marrëveshje është arritur në mbështetje me SHBA.
“Kemi arritur marrëveshje për të marrë me qira dhe për të ankoruar në Triport në Vlorë dy anije prodhuese të energjisë elektrike deri sa TEC-i të vendoset në punë. Janë termocentrale lundruese dhe kjo është arritje sepse do të garantojë një pavarësi energjetike edhe gjatë verës”, tha Balluku.
Balluku tha gjithashtu se bordi ka vendosur që Fierza të mos prodhojnë energji për momentin, në mënyrë që të mblidhen të gjitha ujërat.
Ndërkohë shtoi se edhe gjatë ditëve në vijim pritet që të ketë sërish prurje të ujërave, pasi parashikohet që të kemi mot me shi.