Rusët ikin nga vendi pas urdhërit të Putin, BE në debat nëse do t’i pranojë

“BE-ja duhet të tregojë se është e hapur për ata që nuk duan të bëhen vegël nga Kremlini”.
Kështu tha presidenti i Këshillit Evropian Charles Michel, duke sugjeruar indirekt që vendet anëtare të BE-së të hapin kufijtë e tyre për qytetarët rusë që largohen nga vendi për të shmangur rekrutimin e shpallur nga Vladimir Putin.
“Në parim, unë besoj se Bashkimi Evropian duhet të strehojë ata që janë në rrezik për shkak të bindjeve të tyre politike. Nëse njerëzit në Rusi janë në rrezik për shkak të bindjeve të tyre politike, sepse nuk ndjekin këtë vendim të çmendur të Kremlinit për të filluar këtë luftë në Ukrainë, ne duhet ta marrim këtë parasysh”, tha Charles Michels.
“Evropa duhet të lejojë qytetarët rusë që kërkojnë të largohen nga vendi”, tha presidenti i Këshillit Evropian, duke theksuar se njoftimi i Putinit për rekrutimin e pjesshëm në fillim të kësaj jave kishte ndryshuar dinamikën e luftës.
Gjatë fjalimit të tij në Asamblenë e Përgjithshme të Kombeve të Bashkuara , Charles Michel sulmoi Kremlinin, duke bërë thirrje për përjashtimin e Rusisë nga Këshilli i Sigurimit i OKB-së.