SHIFRAT: Një mijë lindje më shumë se vdekje në Shqipëri, por në krahasim me vitin e kaluar kanë ardhur në jetë 20% më pak vogëlushë

Lindjet dhe vdekjet janë dy komponentë që ndikojnë në ndryshimin e popullsisë. Ato janë të dhëna administrative, të cilat përpunohet dhe publikohen në bazë tre-mujore dhe analizohen nga INSTAT për të prodhuar një sërë indikatorësh me frekuencë vjetore.

Numri i lindjeve për tremujorin e tretë të vitit 2022 është 6.172, duke shënuar një rënie me 19,6 %, krahasuar me tremujorin e tretë 2021. Ndërkohë, numri i vdekjeve për tremujorin e tretë të këtij viti është 5.130, duke shënuar një rënie prej 19,8 %, krahasuar me tremujorin e tretë 2021.

Referuar të dhënave të publikuara nga Instituti i Statistikave, shtesa natyrore e popullsisë në tremujorin e tretë 2022 tregon se janë 1.042 lindje më shumë se sa vdekje.

Në tremujorin e tretë 2022, gjashtë qarqe të vendit kanë shënuar shtesë natyrore pozitive të popullsisë, ndërsa në gjashtë qarqet e tjera, shtesa natyrore e popullsisë ishte negative.

Në tremujorin e tretë 2022, qarku me shtesën natyrore më të lartë është Tirana, me 928 lindje më shumë sesa vdekje, ndërsa qarku me shtesën natyrore më të ulët është Korça, me 139 vdekje më shumë se sa lindje.

Lindjet

Në tremujorin e tretë 2022, të gjitha qarqet e vendit shënuan ulje të numrit të lindjeve, në krahasim me tremujorin e tretë 2021.

Në tremujorin e tretë 2022, qarku me numrin më të lartë të lindjeve është Tirana me 2.172 lindje, ndërsa qarku me numrin më të ulët është Gjirokastra me 90 lindje.

Rënien më të vogël në përqindje të lindjeve gjatë tremujorit të tretë 2022, krahasuar me të njëjtën periudhë të vitit 2021 e zë qarku i Beratit me 8,7 %, ndërsa rënien më të madhe e ka qarku i Korçës me 28,7 %.

Vdekjet

Në tremujorin e tretë 2022, në 11 qarqe të vendit u shënuan ulje të numrit të vdekjeve, në krahasim me tremujorin e tretë 2021.

Në tremujorin e tretë 2022, qarku me numrin më të ulët të vdekjeve është Kukësi me 126 vdekje, ndërsa qarku me numrin më të lartë është Tirana me 1.244 vdekje.

Uljen më të madhe në përqindje të vdekjeve gjatë tremujorit të tretë 2022, krahasuar me të njëjtën periudhë të vitit 2021 e zë qarku i Lezhës me rënie prej 29,7 %.

Të dhënat e lindjeve sipas karakteristikave bazë demografike sigurohen nga Drejtoria e Përgjithshme e Gjendjes Civile, e cila dërgon në INSTAT vetëm numrin e lindjeve të banuesve në Shqipëri.

Konsiderohen të gjitha lindjet e banuesve në Shqipëri gjatë periudhës referencë, duke mos marrë parasysh lindjet e banuesve jashtë Shqipërisë (emigrantëve), edhe pse mund të regjistrohen në zyrat e gjendjes civile, pranë ish-vendbanimeve të tyre.

// NEWSBOMB ALBANIA

Back to top button
LAJMET E FUNDIT