Debati për furnizimin e jahteve në Durrës, Pirro Vëngu: Edhe gjysmë dite të qëndrojnë, mbajnë gjallë kompani të tëra në Port

Studiuesi dhe këshilltari politik, Adri Nurellari është përfshirë në një debat në rrjetet sociale me ekonomistin Gjergji Bojaxhi, përsa i përket ankorimit dhe furnizimit të jahteve luksoze me naftë në Durrës. Në këtë debat është përfshirë dhe vetë drejtori i Autoritetit Portual Durrës, Pirro Vëngu.
“Strategjia e qeverisë aktuale shqiptare për të nxitur turizmin elitist është ofrimi i karburantit më të lirë në Mesdhe për superjahtat e miliarderëve të botës (ndërkohë që qytetarët taksapagues e blejnë me çmimin më të lartë në Evropë”, shkruan ndër rreshta Nurellari.
Mirëpo, drejtori Pirro Vëngu e quan këtë një reagim të nxituar dhe thotë se është ngritur një keqkuptim i madh në debatin publik lidhur me kohën e qëndrimit të jahteve në portet tona, siç ishte tre ditë më parë ankorimi i jahtit 500 milionë $ të Jeff Bezos.
Vëngu thekson se edhe nëse këto mjete vijnë gjysmë dite për furnizim, ato mbajnë gjallë kompani të tëra shërbimesh në tokë: Agjenci detare e doganore, furnizime në bord, mirëmbajtje, e riparim. Nafta është vetëm një hallkë e procesit, shton ai.
“Nuk e kuptoj përse duhet të skandalizohemi sepse portet tona janë plot me jahte e kroçiera! Ka një ekonomi të mirëfilltë mbështetëse në tokë e cila s’ka pikë lidhje me çmimin e karburanteve dhe as me fiskalizimin e tyre”, vijon drejtori i Autoritetit Portual Durrës.
Në Shqipëri ka një rritje eksponenciale të mjeteve lundruese për qëllime turizmi, thotë Pirro Vëngu, teksa shton se ta trajtosh këtë dukuri të ekonomisë tonë nën prizmin e karburanteve është të refuzosh të shohësh realitetin.