Fishekzjarrët kushtojnë shtrenjtë, UEFA gjobit FSHF-në dhe paralajmëron tifozët

Kushtojnë shtrenjtë flakadanët e hedhur në fushë në fillim të ndeshjes me Poloninë nga tifozët kuqezi, duke shkaktuar ndërprerjen e ndeshjes për disa minuta.

Komisioni i Disiplinës në UEFA e ka dënuar Federatën Shqiptare të Futbollit, si organizatore të takimit, me një gjobë të majme prej 44 mijë eurosh.

Gjithashtu u vendos edhe mbyllja e tribunave pas porte në stadiumin “Air Albania”, për një ndeshje, por ky vendim u pezullua me kusht dhe do të aplikohet në rast përsëritjeje të incidenteve gjatë dy vitete të ardhshme.

Vetë FSHF reagoi duke u bërë apel tifozëve të shmangin sjelljet e palejuara, në mënyrë që të mos arrihet te mbyllja e tribunave dhe lënia e Kombëtares pa ‘lojtarin e 12’…

Vlen të theksohet se biletat për ndeshjen Shqipëri-Çeki dolën në shitje të premten e kaluar dhe u shitën brenda pak orëve, pasi interesi ishte vërtetë shumë i lartë…