Bie qeveria e Serbisë?! Propozohet shpërndarja e Kuvendit dhe shpallja e zgjedhjeve

Qeveria e Serbisë i ka dërguar së fundmi një kërkesë presidentit, Aleksandër Vuçiç.

Nga mediat serbe bëhet me dije se përmbajtja e letrës është për shpërndarjen e Kuvendit dhe shpalljen e zgjedhjeve për deputetë.

Në arsyetimin e qeverisë serbe thuhet se “mbajtja e zgjedhjeve të reja parlamentare në rrethanat ekzistuese do të siguronte një shkallë më të lartë të demokracisë, duke reduktuar tensionet e krijuara midis opsioneve kundërshtare në shoqëri, duke refuzuar ekskluzivitetin dhe gjuhën e urrejtjes dhe duke afirmuar të drejtën për të shprehur lirisht mendime dhe pikëpamje për çështje të caktuara politike, ekonomike dhe të tjera, duke përfshirë edhe afirmimin e mëtejshëm të vlerave evropiane”, shkruan politika.rs.

Në propozimin për shpërndarjen e parlamentit, ndër të tjera thuhet se kohët e fundit ka pasur kërkesa nga një pjesë e opinionit për shpalljen e zgjedhjeve të reja të jashtëzakonshme për deputetë dhe se më 11 shtator, një pjesë e partive politike opozitare i paraqitën një kërkesë të tillë Presidentit të Republikës.