Karriget përmbys dhe flakadanë në sallën e Kuvendit/ E “pësojnë” tre deputetët e opozitës (EMRI)

Sekretariati për Procedurat, Votimet dhe Etikën për vlerësimet e masës disiplinore ka përjashtuar për 10 ditë nga seancat plenare, deputetët Ervin Salianji, Edmond Spaho dhe Petrit Doda.

Kërkesa u bë nga Partia Socialiste tek kryetarja e Kuvendit Lindita Nikolla, kërkesë e cila më pas u shqyrtuar nga Sekretariati. Partia Socialiste kërkoi përjashtimin e deputetëve pas kaosit të krijuar ditën e enjte në Kuvend ku mes deputetëve pati përplasje, ndërsa në një moment deputeti Ervin Salianji ndezi flakadanë.

Për pasojë të situatës të tensionuar që u krijua, seanca plenare u ndërpre.

“Në nisje të seancës, deputeti Ervin Salianji, zaptoi foltoren duke penguar zhvillimin normal të punimeve plenare, si dhe i ndihmuar nga deputetët Petrit Doda dhe Edmond Spaho, ndezi disa flakadën në sallën e seancave”-thuhej në kërkesën e PS-së.

Kujtojmë se deputetët e ish-kreyministrit Sali Berisha dhe Gazment Bardhit kanë deklaruar se do bllokojnë çdo veprimtari të Kuvendit, deri sa Mazhoranca të pranojë ngritjen e Komisioneve Hetimore.