Vëllezërit e Bedrie Lokës e dinin që ajo dhunohej por nuk e mbrojtën! Zbardhet dosja: Çfarë dëshmuan në polici

Familjarët e Bedrie Lokës ishin të gjithë të vetëdijshëm për dhunën që Xhemal Loka ushtronte vazhdimisht ndaj 41-vjeçares, e megjithatë duket se në asnjë moment nuk kanë ndërhyrë për të mbrojtur

Në dosjen e prokurorisë, siguruar nga Top Channel, renditen dëshmitë e vëllezërve të së ndjerës, të cilët njëzëri pranojnë se motra e tyre dhunohej, madje gjendja ishte rënduar gjatë dy viteve të fundit. Megjithatë, duket se ata nuk kanë vepruar për ta ndaluar këtë gjë, e cila dyshohet se ka ndikuar për ta shtyrë 41-vjeçaren drejt vetëvrasjes.

Pandeli Bushi: “Që në mars 2000, që kur është martuar motra ime, ai e ka trajtuar keq. E ka dhunuar disa herë fizikisht. Besoj se këtë veprim e ka bërë vetëm prej dhunës së Xhemalit dhe nuk ka lidhje me TikTok.”

Mahmut Bushi: “Kam dyshime dhe kam bindje se motra ka pirë helm për shkak të marrëdhënies, presionit që kishte nga bashkëshorti i saj. E njoh shumë mirë Xhemalin, ai ka qenë i dhunshëm dhe nuk e ka trajtuar mirë motrën, sidomos këto dy vite. Këtë fakt që ai nuk e trajtonte mirë, ma ka thënë motra ime disa herë dhe i kam thënë Xhemalit shumë herë që të mos e keqtrajtonte motrën time.”

Xhim Bushi: “Ajo e ka bërë këtë veprim vetëm prej dhunës së bashkëshortit Xhemal Loka. Ata i kanë pasur marrëdhëniet shumë keq, atë gjë e ka ditur shumë mirë mbesa ime Rosalinda. Mendoj se ajo e di historinë e kësaj pune, por ajo nuk tregon menjëherë, se normalisht i vjen keq për babanë e vet.”

Dhimitër Bushi: “Motra ime i ka pasur shumë keq marrëdhëniet me burrin e saj. Madje, edhe ditën e ngjarjes, Xhemali e ka dhunuar motrën time.”

Ndërsa vetë Xhemal Loka ka deklaruar se “fajtori” i vetëm është “TikTok”. Sipas tij, gruaja vrau veten për shkak të profileve denigruese që kishin një vit që qarkullonin në rrjetin social.

Xhemal Loka: “Prej një viti, ajo nuk ndihej mirë, për shkak të një adrese në TikTok, që i kishin hapur. Sipas meje, këtë veprim, Bedrija e ka bërë vetëm për shkak të adresës që i kanë hapur në TikTok.”