Pavarësia e Kosovës/ Presidenti Begaj mesazh urimi: Jemi dy shtete, por një komb!

Me rastin e 16-vjetorit të Pavarësisë së Kosovës, presidenti i Shqipërisë, Bajram Begaj ka dërguar një mesazh urimi.

Në një mesazh të ndarë në rrjetet sociale, Begaj shkruan se jemi dy shtete, por një komb me një gjuhë e një kulturë.

Mesazhi i plotë:

Kosova 16 vjet Republikë.

Ajo sot është një histori suksesi në Ballkan në respektimin e të drejtave të njeriut, me kulturën e saj të gjallë dhe energjinë rinore të një populli që sheh përpara.

Kosova, shtet i pavarur, është një faktor pozitiv, paqedashës dhe i rëndësishëm për sigurinë në rajonin tonë.

Jemi dy shtete, por një komb me një gjuhë e një kulturë.

Ne duhet ta shfrytëzojmë këtë mundësi të artë për të treguar se jemi të aftë të ndërtojmë shtete moderne sipas parimeve demokratike, në bashkëpunim e bashkërendim me partnerët tanë, SHBA-në dhe BE-në.

Gëzuar, Kosovë!