Protesta e Rithemelimit/ Mbi 400 efektivë të Policisë dhe RENEA “blindojnë” Parlamentin, gati dhe autoboti i ujit

Teksa na ndajnë vetëm pak minuta nga protesta e Rithemelimit, që do të mbahet para Kuvendit, duket se Policia e Shtetit ka marrë masat e nevojshme.

Bëhet me dije se rreth 400 efektivë nga Policia e Tiranës dhe Forcat e Sigurisë Kombëtare (FNSH) janë angazhuar për mbarëvjatjen e protestës para parlamentit, ku si në çdo protestë krijohet kordon me efektivët në perimetrin e parlamentit.

Masat janë marrë nga Drejtoria e Përgjithshme e Policisë së Shtetit në koordinim me DVP Tiranë. Në perimetrin e parlamentit janë instaluar kamera me rezolucion të lartë për të identifikuar çdo lëvizje të protestuesve.

Ndërkohë RENEA është në gatishmëri në rast se do të ketë incidente. Po ashtu edhe autobotë me ujë ndodhen në pjesën e pasme të parlamentit nëse do të jetë e nevojshme për të ndërhyrë.