E FUNDIT/ Dënohet Fredi Beleri, sa vite burg do vuajë kryebashkiaku i zgjedhur

GJKKO ka dënuar me dy vite burg kryetarin e zgjedhur të bashkisë Himarë, Fredi Beleri.

Teksa SPAK kishte kërkuar 2 vite e 6 muaj për veprën penale të shit-blerjes së votës, Gjykata e Posaçme ka vendosur 2 vite burg për Belerin.

Më herët, gjatë seancës Beleri lexoi deklaratën para shpalljes së vendimit, ku u shpreh se ky hetim është politik.

“Prokurori kërciste stilolapsin në tavolinë gjatë gjyqit, ky është presion. Ky hetim dhe këto akuza janë sajesa qesharake.

Këto konkluzione nuk mund të merren parasysh, dosja nuk ka fakte ndaj nuk kam kërkuar gjykim të shkurtuar. Të gjitha gjetjet e Prokurorisë kundërshtohen nga avokatët e mi. Herët a vonë, e vërteta do dalë një ditë. Jam përgjuar 24 orë në ditë, provat nuk përputhen. Në të njëjtën kohë që thuhet se Arseni ka folur me mua, ai ishte në komisariatin e Vlorës. Prokuroria duhet të verifikonte faktet. Gjykata e Apelit pranoi të gjitha kërkesat e prokurorisë dhe asnjë kërkesë timen. Një ndër to t’i kërkonte informacion gjykatës së Vlorës. Kjo është një çështje politike, me mua u shkelën të gjitha parimet edhe prezumimi i pafajësisë. U tejkaluan kompetencat. Kërkesa e prokurorisë për 2.6 vjet burg nuk ka asnjë logjikë.

Për dy kryetarë bashkie ka kërkuar shërbim prove. Sa herë të ketë zgjedhje rezultati do jetë i njëjtë, himarjotët nuk janë budallenj. Është e padrejtë që kësaj çështjeje t’i jepet kuptim patriotik. Jam besimplotë nuk e ndjej veten fajtor. Herët a vonë do gjej drejtësi. Sot duhet t’i thoni jo presionit të pushtetit, të tjerët janë kalimtarë dhe besnikë të partisë. Dy prokurorët do t’i gjykojë historia”.– tha Beleri.

Beleri u arrestua disa ditë para zgjedhjeve të 14 maj 2023, ku garonte për kryetar bahskie në Himarë, me koalicionin “Bashkë Fitojmë”. Ai u prangos pas publikimit të disa audio-përgjimeve ku shfaqej duke komunikuar për blerje votash.