Energjia e rinovueshme, Euronews: Shqipëria dhe Islanda, të vetmet në Europë që mbështeten tek uji, dielli dhe era

Shqipëria dhe Islanda janë vendet e vetme në Europë që furnizohen 100% nga energjia e rinovueshme që prodhohet nga uji, era, dielli apo burimet gjeotermale. Në një analizë të Euronews, theksohet se përveç dy vendeve europiane, janë edhe 5 të tjera në botë që mbështeten në këtë drejtim dhe se viti i kaluar ishte viti më i mirë i regjistruar për prodhimin e energjisë nga era.

Ministria e Infrastrukturës dhe Energjisë pret të marrë 36 megavatë energji të gjeneruar nga parqet eolike në 2025 pasi deri më tani janë licensuar 13 operatorë. Ekspertët i thanë Euronews se edhe pse për momentin vendin kryesor e zë energjia e përdorur nga uji dhe era, edhe ajo diellore do të marrë një vend kryesor në të afërmen e afërt.

Në këtë drejtim, Shqipëria ka ndërmarrë një sërë nismash si për parqet fotovoltaike, ashtu edhe për mbështetjen e bizneseve apo familjarëve për vendosjen e paneleve. Të dhënat zyrtare flasin për 8.8 terravat energji të prodhuar në 2023 ose 23.7% më shumë se një vit më parë.

Përveç Shqipërisë dhe Islandës, listës me energji 100% të rinovueshme i bashkohen edhe 5 vende të tjera jashtë Europës: Butani, Etiopia, Nepali, Paraguaji dhe Republika Demokratike e Kongos. Norvegjia u afrua me 98% të prodhimit të energjisë së saj nga era, uji ose dielli.

Në 2023 ishte Kina që kryesoi për instalimin e energjisë së erës në det dhe në tokë, e ndjekur nga SHBA, Brazili dhe Gjermania. Një rritje të fortë pati edhe Holanda. 40 vende te tjera kanë gjysmën e energjisë së rinovueshme. Liderët botërorë janë angazhuar për trefishim të energjisë së rinovueshme deri në fund të dekadës me qëllim uljen në minimum të ndotjes së natyrës.

Back to top button
LAJMET E FUNDIT