FOTO/ Policia pas vrasësit të efektivit, shpërblim për këdo që ka informacion

Policia e shteti ka njoftuar se vijon puna për kapjen e Azgan Mernicës, 23-vjeçari që sot ekzekutoi me armë zjarri efektivin e “Shqiponjave”, Novrus Cenalia.

Ai u arratis menjëherë pas ngjarjes duke braktisur dhe mjetin me të cilin po lëvizte fillimisht, teksa dyshohet se ka dhe një bashkëpunëtor. Policia ka vënë dhe një shpërblim prej 30 mijë eurosh, për këdo që ka informacion mbi të.

Njoftimi i policisë:

Në lidhje me ngjarjen e ndodhur në fshatin Baltëz, ku u vra me armë zjarri, punonjësi i Policisë (jashtë shërbimit), shtetasi N. C., Policia e Shtetit kërkon ndihmën dhe bashkëpunimin e qytetarëve për lokalizimin e autorit të dyshuar të vrasjes, shtetasit Azgan Mernica, 23 vjeç, banues në fshatin Sulaj.

Kushdo që ka informacion të telefonojë në numrin pa pagesë 112, duke iu garantuar anonimatin. Për çdo informacion të vlefshëm, Policia e Shtetit vë në dispozicion shpërblimin 30 000 euro.

Ndërkohë, shërbimet e Policisë së Fierit, Forca Kombëtare e Sigurisë dhe Reparti Special “RENEA”, në drejtimin e Drejtorit të Përgjithshëm të Policisë së Shtetit, vijojnë veprimet operacionale në zonë, me qëllim kapjen dhe vënien në pranga të 23-vjeçarit.

Gjithashtu, në të gjitha akset rrugore lidhëse me qarkun Fier janë ngritur pika kontrolli.

Grupi hetimor, në drejtimin e Prokurorisë, po vijon veprimet në vendngjarje për të sqaruar dhe dokumentuar me prova ligjore rrethanat e rastit.