FOTO/ U vu në pranga në banesën e tij në Shijak, publikohet fotoja e Astrit Avdylajt

Astrit Avdylaj, kreu i një grupi të njohur kriminal në Shijak, është arrestuar sot në banesën e tij, ndërsa gjatë ndalimit i është gjetur një armë zjarri tip pistoletë. Avdylaj ishte në kërkim nga SPAK në kuadër të operacionit “Revanshi”, i cili synonte goditjen e grupimeve të organizuar kriminale në vend dhe arrestimin e personave të përfshirë në veprimtari kriminale të rënda.

Astrit Avdylaj dyshohet se ka pasur një rol kyç në organizimin e kushteve për vrasjen e Durim Bamit, duke ndihmuar Ervis Marinajn dhe ish-deputetin socialist Arben Ndokën. Komunikimet e regjistruara në aplikacionin “Sky” tregojnë se Avdylaj kishte kontakte dhe bashkëpunim të rregullt me Ndokën dhe ofronte ndihmën e tij për realizimin e planit për eleminimin fizik të Bamit. Për këtë qëllim, Avdylaj i dërgoi nipin e tij, Aldo Avdylajn, dhe Arben Mërkurin te Ndoka.

Pas arrestimit, Astrit Avdylaj është dërguar për hetim te Prokuroria për Krime të Rënda, ndërsa materialet e rastit do të përcillen për zbardhjen e plotë të veprave të tij dhe të përfshirëve të tjerë në skemën e vrasjes.

Ky arrestim shënon një hap të rëndësishëm në luftën kundër kriminalitetit të organizuar në Shqipëri dhe një përpjekje të përbashkët nga autoritetet për të siguruar rendin dhe ligjin në vend.